Olımpıada medalin uzaq kúttim — Nazym Qyzaıbaı
Oǵan basty sebep — fınaldyq aıqastar búgin ótip, chempıon men kúmis júldeger jańa ǵana anyqtaldy.
Ol marapattaý rásiminen keıingi áserin bólisip, shaǵyn suhbat berdi.
— Búgin fınaldyq jekpe-jekterdi kórip, qarsylasymnyń qanshalyqty myqty ekenin baıqadym. Al rıngte ony ózim sezbeppin. Myqtyny myqty dep moıyndaý kerek. Jalpy, meniń daıyndyq ýaqytym óte qysqa bolyp qaldy. Lıtsenzııany sońǵy týrnırde utyp aldym. Eger joldamany Italııada, bolmasa Azııa oıyndarynda jeńip alǵanda budan da jaqsy, úlken daıyndyqpen keletin edim. Qola medal jeńip alǵanyma da qatty qýanyp turmyn. Medaldi mine, moıynyma jańa ǵana taqtym. Sheshkim kelip turǵan joq. Men buny uzaq kúttim. Buryn Gennadıı Golovkındi tek televızordan kóretinmin. Mine, búgin qasymda ózi quttyqtap, marapattap jatyr. Men úshin bul Olımpıadanyń qola júldesi — ómirimdegi eń qymbat asyl dúnıeniń biri, — dedi boksshy marapattaý saltanatynan keıin.
Sondaı-aq, Nazym osy medalimen Parıjdegi Eıfel munarasyna baryp, sýretke túsýdi armandaǵanyn da aıtyp ótti.
— Jartylaı fınalda qola júlde jeńip alǵan soń bas bapkerim Eldos Saıdalın «Eıfel munarasyna baryp, qydyryp fotoǵa túsip keleıik» dedi. Men «joq, Olımpıadada jeńip alǵan medalimmen ǵana sýretke túsemin» dep kelisim bermedim. Endi erteń mindetti túrde sol jerde qydyramyn. Aýylymdy da saǵyndym. Ata-anam, týystarymdy da — bárin qatty saǵyndym. Qazir elden men tanıtyn, tipti tanymaıtyn kisiler de quttyqtap qońyraý shalyp jatyr. Bastysy Olımpıada júldegeri ekenimdi sezinip jatyrmyn, — deıdi Nazym Qyzaıbaı.
Esterińizge sala keteıik, Nazym Qyzaıbaı 7 tamyz kúni jartylaı fınalda qytaılyq Vý ıÝmen qolǵap túıistirip, tóreshiler sheshimimen utylǵan edi.
Degenmen Olımpıada oıyndarynyń qola júldesin qanjyǵasyna baılady.