Olımpıada qorytyndysy: Elsııar Qanaǵatov eń nashar nátıje kórsetken sport túrin aıtty
«Ózderińiz bilesizder, 34 sportshy 87 joldamamen osy Olımpıadaǵa bardy. Árıne, jankúıerler bizden medal kútti. Beıjiń Olımpıadasynda 29 memleket tıisti nátıjege qol jetkizip, medal aldy. Biz egemendik alǵannan beri qysqy Olımpıadalarǵa qatysqanda 8 ǵana medalǵa ıe bolyppyz. Onyń tórteýin bir sportshy alyp berdi. Osy joly alǵa basatyndaı jaǵdaı boldy. Frıstaıl-mogýldan ıÝlııa Galysheva qatysty jáne short-trekten de úmitimiz jaqsy boldy. Alaıda medalǵa ıe bola almady», - dedi E. Qanaǵatov Ortalyq kommýnıkatsııalar qyzmetinde
Onyń aıtýynsha, elimiz sportshylary arasynda short-trekten birshama ilgerileý bolǵany baıqaldy.
«Saıysta Abzal Ájiǵalıevtiń nátıjesin kórdińizder. Abzal óziniń sózinde de short-trekti áli de damytý kerek ekenin aıtty, biz de bul ýájin qoldaımyz. Konkı sport túrinen de bizde alǵa jyljý bar dep aıtýǵa bolady», - dedi UOK sport dırektsııasynyń dırektory.
Sonymen qatar ol eń nashar nátıje kórsetken sport túri shańǵy jarysyna qatysty ekenin aıtty.
«Sońǵy jyldary shańǵy sportynyń nátıjesi tómendep ketti. Bul baǵytta buqaralyq sportty damytý nashar bolyp tur. Soltústik óńirlerde shańǵy sportyn damytý tıisti deńgeıde emes. Sondyqtan osy Olımpıadanyń qorytyndysy boıynsha shańǵy, bıatlonnyń nashar nátıjesine, jalpy Beıjińdegi nátıjemizge durystap saraptama jasap, durys jaýaptarmen alǵa jyljý kerek. Bul turǵyda sport túrlerin buqaralyq damytýǵa ekpin qoıý qajet. Atap aıtqanda, buqaralyq sportty damytýǵa kóńil bólgen jón. Aýyldy jerlerge de sport keshenderin salý ózekti», - dedi E. Qanaǵatov.
Budan buryn habarlanǵandaı, Osy sport túrleriniń arasynda tek short-trekshilerimiz ǵana Beıjiń Olımpıadasynda ózderiniń eń joǵary kórsetkishin kórsete bildi. Abzal Ájiǵalıev 500 metr qashyqtyqta medalǵa synyq súıem jetpeı, Olımpıada oıyndaryn 4-shi orynmen aıaqtady.