Olımpıada: Qazaqstandyq sportshylardyń 8-shi kúngi nátıjeleri
Búgin tań ata qazaqstandyq mánerlep syrǵanaýdyń juldyzy, Sochı Olımpıadasynyń qola júldegeri, álem chempıonatynyń kúmis jáne qola júldegeri, sondaı-aq, Almatyda ótken 28-qysqy Ýnıversıadanyń chempıony Denıs Tenniń jolyna úmitpen qaradyq. Alaıda, otandasymyz qysqa baǵdarlamada kórsetken nátıjesinen keıin "kórermender" qataryna qosyldy.
Ten jeke óner kórsetetin qysqa baǵdarlamadan 70,12 (30,77 +39,35) upaı jınady. Natıjesinde 30 sportshynyń ishinen 27-shi orynǵa taban tirep, erteń erkin baǵdarlamada óner kórsetetin úzdik 24 sportshynyń qataryna iline almady.
Endi shańǵyshylarymyzǵa oralar bolsaq, búgin shańǵy jarysynan erler arasynda erkin stılden 15 shaqyrymdyq jarys ótken bolatyn. Onda el namysyn Denıs Volotka, Evgenıı Velıchko jáne Vıtalıı Pýhkalo qorǵap, úsheýi de júldeli oryndardan qur qaldy. Sonymen atalǵan qashyqtyqty otandastarymyz arasynan Pýhkalo 36:57.4 ýaqytta baǵyndyryp, márege 54-shi bolyp jetti. Al Evgenıı Velıchko (37:28.6) 61-shi, Volotka bolsa (37:39.8) 64-shi orynǵa turaqtady.
Sondaı-aq, búgin taý shańǵy jarysynan el namysyn qorǵaǵan Igor Zakýrdaev 41-orynnan asa almady.
Qazaqstandyqtar úshin búgingi jarysty úlken tramplınnen shańǵymen sekirý saıysynan Sergeı Tkachenko jaqsy kórsetkishpen aıaqtady. Ol bul saıysta 70,9 upaı jınap, erteń, ıaǵnı 17-shi aqpanda ótetin ekinshi irikteý saıysyna joldama aldy.
Esterińizge sala keteıik, 9-shy aqpanda alaýy tutanǵan Aq Olımıada oıyndaryna Qazaqstan 57 joldama jeńip alǵan bolatyn. Olar sporttyń 9 túrinen el namysyn qorǵap jatyr. Al, jalpy Olımpıada oıyndarynda sporttyń 15 túrinen 102 madal jıyntyǵy sarapqa salynady. Jarys 25-shi aqpanda óz máresine jetedi.