Olımpıada: Qazaqstandyq sportshylardyń 7-shi kúngi nátıjeleri
Búgin keshegi alaı-dúleı bolyp soqqan qatty jel sap basylyp, jarystar kestesine sáıkes josparlanǵan barlyq oıyndar óz ýaqytynda ótti. Qazaqstandyq sportshylar sporttyń 4 túrinen baq synady. Atap ótsek, olar taý shańǵysy, shańǵy jarysy, bıatlon jáne frıstaıldan synǵa tústi.
Jasyrary joq, búgingi jarysta qazaq eli frıstaıl-akrobatıkadan Janbota Aldabergenovanyń jolyna úmitpen qarady. Sebebi, osyǵan deıin Janbota iri dodalarda ózin jaqsy qyrynan kórsetip júrdi. Sochı Olımpıadasynda eń úzdik altylyqqa engeni taǵy bar. Búgin bul saıystan medaldar sarapqa salynbasa da, fınaldyq kezeńge joldama alady degen senimde boldyq. Ókinishke qaraı úmitimiz selge ketti.
Janbota Aldabergenova birinshi irikteý kezeńiniń qorytyndysy boıynsha 81.07 upaı jınap, 12-oryn alsa, ekinshi irikteý kezeńinde 85,36 upaı jınap, jetinshi orynǵa taban tiredi. Osylaısha fınaldyq kezeńge ótpeı qaldy. Jarystan keıin tilshiler kútip turdy. Alaıda, kóz jasyna erik bergen sportshymyz «eshteńe aıta almaımyn. Keshirińizdershi meni», - dedi. Ary qaraı bizde mazalaǵan joqpyz.
Sondaı-aq, osy synda óner kórsetken Marjan Aqjigit 12-oryn ıelense, Aqmarjan Qalmurzaeva men Aıana Joldas saıysty 12 jáne 18-orynda aıaqtady.
Al taý shańǵysy saıysynan erler arasynda synǵa túsken otandasymyz Igor Zakýrdaev Olımpıada oıyndaryndaǵy shapshań túsý saıysyn 39-shy orynmen aıaqtasa, áıelder arasynda el namysyn qorǵaǵan ekinshi sportshymyz Marııa Grıgorova slalomda 51-shi oryn aldy.
Sonymen birge búgin shańǵy jarysynan erkin stılde jekeleı saıysta áıelder arasynda synǵa túsken Valenııa Tıýleneva 47-shi bolyp márege jetse, Anna Shevchenko men Elena Kolomına jarysty 56-shy jáne 63-oryndarmen aıaqtady.
Búgin bıatlonnan synǵa túsken qyz-jigittermizde júldeli oryndardan kórine almady. Áıelder arasynda eń úzdik nátıjeni Galına Vıshnevskaıa kórsetti - 45-oryn. Olga Poltoranına men Alına Raıkova Galınadan keıingi satylarda ornalasty. Darıa Klımına jarysty 51-orynda aıaqtady. Sonymen birge búgin erlerden tórt qazaqstandyq bıatlonshy 20 shaqyrym qashyqtyqqa jekeleı saıysta óner kórsetti.
Osy jarysta erler arasyndaǵy eń joǵary nátıjeni Maksım Braýn kórsetti - 61 oryn. Bir tómen satyda Vasılıı Podkorytov jaıǵasty. Tımýr Hamıtgatın saıysty 72-shi, al Vladıslav Vıtenko 83-shi orynda aıaqtady.
Esterińizge sala keteıik, 9-shy aqpanda alaýy tutanǵan Aq Olımıada oıyndaryna Qazaqstan 57 joldama jeńip alǵan bolatyn. Olar sporttyń 9 túrinen el namysyn qorǵap jatyr. Al, jalpy Olımpıada oıyndarynda sporttyń 15 túrinen 102 madal jıyntyǵy sarapqa salynady. Jarys 25-shi aqpanda óz máresine jetedi.
Foto: Danııar Maılybaev