Olımpıada chempıondarynyń áleýmettik jaǵdaıyn arttyrýǵa basymdyq beriledi
Atap aıtqanda qazirgi kezde 25 sport túrinen Qazaqstan sportshylary 107 joldamany ıelendi. Búginde lıtsenzııalyq saıystar aıaqtalýǵa jaqyndady. Osyǵan baılanysty búgin Aqordada QR Memlekettik hatshysy Muhtar Qul-Muhammedtiń tóraǵalyǵymen ótken respýblıkalyq keńeste Sport jáne dene shynyqtyrý isteri agenttiginiń basshysy Talǵat Ermegııaev esep berdi.
Onyń sózine qaraǵanda, London Olımpıadasyna daıyndyq óte joǵary deńgeıde ótip jatyr. «Aldynda biz Olımpıadada 13 medaldi ıelený (jalpy komandalyq esepte 28-shi oryn) josparyn aıtqanbyz. Onyń ishinde 3 altyndy qanjyǵaǵa baılaý mejelenip otyr. Sol josparymyzdan úmittimiz», - deıdi vedomstvo basshysy. Bul turǵyda osyndaı boljam jasap otyrǵandarǵa «aýyzyna maı, astyna taı» dep qana aıta alamyz. Agenttiktegiler bıylǵy aıtýly dodaǵa el sportshylary saqadaı saı turǵandyqtaryn alǵa tartýda jáne olardyń osy senimdi ýájderi keńeske qatysqandardy bir serpiltip tastady. «Atap aıtqanda, bizde búginde Olımpıada boıynsha eshqandaı da problema joq. Daıyndyǵymyz óte joǵary deńgeıde ótip jatyr. Bapkerler men sportshylarǵa barlyq jaǵdaılar jasaldy. Endi sportshylarymyzǵa tek iske sáttilik tileımiz», - dep toqtaldy Talǵat Amangeldiuly.
Atap aıtqanda, Olımpıada qarsańynda jedel shtab jáne keshendi ǵylymı top jumys istep jatqan kórinedi. Kelisimsharttyq negizde sheteldik úzdik mamandar (13 maman) daıyndyq sharalaryna tartylǵan eken, sonymen qatar 21 sport túrinen olımpıadalyq komandaǵa kandıdattarmen kelisimsharttar jasalǵan. Ulttyq qurama sapyndaǵylardyń josparly tapsyrmalary men oqý-jattyǵý úderisin oryndaý boıynsha qatań qadaǵalaý men eseptilik qamtamasyz etilgen syńaıly. Eń qyzyǵy, respýblıkalyq dopıngke qarsy zerthana zamanaýı medıtsınalyq-dıagnostıkalyq jabdyqpen jasaqtalǵan eken. Osy oraıda mamandar tıisti oqýdan ótip, 6 myńnan astam saraptamalar men testiler jasalǵan. «Qazirgi kezde joldama alǵan barlyq sportshylar mindetti túrde turaqty dopıngke qarsy baqylaýdan ótip jatyr», - dedi agenttik tóraǵasy.
Budan bólek, materıaldyq turǵyda yntalandyrý boıynsha quramadaǵy bapkerler men oqytýshylardyń jalaqysy artty. 1-den 6-shy orynǵa deıingi júldeli orynǵa úmitti sportshylar kelisimshart aıasynda aı saıyn 1-5 myń AQSh dollary aralyǵynda alady eken. Beıjiń olımpıadasyna daıyndyq kezeńimen salystyrǵanda bolashaǵy zor atletterdiń úlesi 7 sport túrinen eki esege artyp otyr.
Endi eń bastysy, qazirgi kezdegi 24 aılyq eseptik kórsetkishtiń ornyna 45-ten 92 AEK-ke deıingi kólemde olımpıadalyq, paralımpıadalyq jáne sýrdolımpıadalyq oıyndardyń jáne sporttan Álem chempıonattarynyń jeńimpazdary men olardyń bapkerlerine ómirboıy osyndaı tólemdermen qamtamasyz etý máselesi qarastyrylyp jatyr. Bul turǵyda óziniń barsha ómirin sportqa arnaǵandar keı jaǵdaılarda jarystar kezinde alǵan jaraqattarynan múgedek bolyp jatatyny belgili. Memlekettiń sporttyq ımıdjin arttyrýǵa, eldegi dene shynyqtyrýdy damytýǵa úles qosqan sportshylardyń eńbegin eskere otyryp, olardyń sporttyq mansaby aıaqtalǵannan keıin laıyqty qoldaý jasaý mańyzdy.
«Sport túrlerinen ulttyq quramalardyń músheleri arasynda otansúıgishtik tálim-tárbıe berýdi kúsheıtý boıynsha jumystar jandandy. Agenttik janynan qurylǵan komıssııa sportshylarmen memlekettik Ánurandy bilýi turǵysynda jumys jasap jatyr», - dep toqtalyp ótti T. Ermegııaev.
Óz kezeginde M. Qul-Muhammed London Olımpıadasynda Qazaqstan Ánuranynyń tıisti deńgeıde oryndalýyn tapsyrdy. Bıyldyń basynda keıbir elderde ótken álemdik dodalarda Qazaqstan Ánurany tıisti deńgeıde oryndalmaǵanyn eskerip ótken Memlekettik hatshy: «Bıylǵy Olımpıadada amanshylyq bolsa, Qazaqstan Týy jelbirep, Ánurany asqaqtaıtyn múmkindikter óte kóp ekendigi kórinip tur. Ótkendegi bolǵan bir-eki oqıǵadan tıisti qorytyndy shyǵaryp, Olımpıadaǵa Ánuranymyzdyń sımfonııalyq orkestrdiń oryndalýynda sapaly túrde jazylǵan túrin alyp barý kerek. Soǵan bir adam jaýap berýi tıis. Sosyn kóteriletin Týymyz memlekettik standartqa saı bolýy shart», - dep júktedi.
Munymen qosa, agenttik basshysy keńes barysynda búginde tıisti sheshimdi qajet etetin problemany atap ótti. Onyń biri - Dene shynyqtyrý jáne sport ǵylymı-zertteý ınstıtýtyn qurýǵa baılanysty kórinedi. Bul másele búginge deıin bıýdjettik ótinimdi qarastyratyn memlekettik organdardyń tarapynan sheshimin tappaı otyr eken.
Al ekinshi másele, materıaldyq turǵyda yntalandyrýǵa baılanysty olımpıada chempıondary men júldegerlerin baspanamen qamtamasyz etýdi zańnamalyq túrde bekitý boıynsha kóterilip otyr. Agenttik basshysynyń sózinshe, «Joǵary sporttyq nátıjeler úshin sportshylardy baspanamen yntalandyrý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasy turǵysyndaǵy másele aıasynda Qarjy mınıstrligi men Ádilet mınıstrligi arasynda kelisilgen biryńǵaı ustanym joq.
«Men osy oraıda Olımpıada oıyndarynda medaldardy jeńip alǵan sportshylarǵa baspana bólý máselesin aıtyp otyrmyn. Osyǵan baılanysty atalǵan problemalardy sheshý boıynsha Sizden, Muhtar Abraruly qolǵabys jasaýdy suraımyn», - dedi T. Ermegııaev.
Bul keńesti qorytyndylaı kele Muhtar Abraruly Qazaqstan sportyndaǵy jetistikterdi eskere otyryp, elimizdiń bul saladaǵy áleýetiniń mol ekendigin atap ótti. Osyǵan baılanysty ol talantty jastarǵa olımpıadalyq rezerv daıyndalatyn oryndarda jattyǵýǵa múmkindik berý kerek dep sanaıdy.
Jıyn barysynda olımpıadalyq rezerv daıyndalatyn basseınge kelip kirý úshin kez kelgen adam medıtsınalyq tekserýden ótip, arnaıy anyqtama alýy kerektigin atap ótken Memlekettik hatshy: «Óıtkeni, ol jerde úlken sportshylar daıyndalady. Sondyqtan da bárine birdeı múmkindik bolmas. Biraq joǵary oqý oryndarynda oqıtyn júzýge qabiletti talantty balalar nege olımpıadalyq rezervtiń basseıninde daındalmasqa?», - dedi. Sonymen qatar ol aýyr atletıkamen aınalysatyn joǵary oqý oryndarynyń stýdentteri de sol olımpıadalyq rezervtiń komandasymen birge ara-tura jattyǵyp turýy kerektigin atap ótip, olar talantty jastarǵa sheberlik synyptaryn ótkizý kerektigine nazar aýdartty.
«Árıne, qazirgi kezde bizdiń sportshylardyń báriniń nazary Olımpıadaǵa aýyp ketkeni túsinikti. Biraq, qaıtyp kelgennen keıin sizder arnaıy jospar jasaýlaryńyz kerek. Oǵan saı sportshylardyń barlyǵy, ásirese olımpıadanyń chempıondaryn, kúmis, qola júldegelerin óńir-óńirge bólip jiberý kerek. Onda olar toı toılap, shapan kıip, at minip júrmeı, stýdentterdiń ortasyna baryp, kezdesýler ótkizsin. Kostıýmderin sporttyq kıimge almastyryp, sport zalynda solarmen birge jattyqsyn. Bul áldeqaıda tıimdi bolady dep oılaımyn», - dedi Memlekettik hatshy Talǵat Ermegııaevke qarata.