Olımpıada «altynyn» jeńip alǵym keledi – dzıýdoshy

ALMATY. QazAqparat -Táýelsizdiktiń tól qurdastary bıyl 30 jasqa tolady. Egemen elmen birge ósip kele jatqan olardyń maqsaty aıqyn, oıy azat, armany asqaq. Solardyń biri 1991 jyly týǵan dzıýdoshy Vıktor Demıanenko. Halyqaralyq týrnırlerde el namysyn qorǵap júrgen sportshy QazAqparat tilshisine óziniń josparlary týraly aıtyp berdi.

Vıktor Demıanenko 1991 jyly maýsym aıynda Almaty qalasynda dúnıege keldi. Onyń sportpen shuǵyldanyp júrgenine18 jyl. Ol 100 kelige deıingi salmaqta óner kórsetedi. QR ulttyq qurama komandasynyń múshesi. QR birneshe dúrkin chempıony, 2010 jylǵy jastar arasyndaǵy álem chempıonatynyń qola júldegeri, 2012 jylǵy Azııa chempıonatynda qola medalin jeńip aldy. «Tashkent-2016» jáne «Týnıs-2018» Gran Prı kezeńiniń qola júldegeri. 2019 jyly Azııa Kýbogynyń chempıony atandy.

- Dzıýdomen neshe jastan bastap aınalystyńyz?

- Dzıýdoǵa 10 jasymda keldim. Sporttyń osy túrine meni ata-anam jiberdi. Men sporshylar otbasynda ómirge keldim: ákem boksshy, anam basketbolmen aınalysty, al artymnan ergen eki qaryndasym tennıske áýes. Meniń kókem- Vıktor Demıanenko Máskeýde ótken boks Olımpıada oıyndarynyń júldegeri. Sol kisiniń qurmetine meniń atymdy Vıktor dep qoıǵan.

- Sporttaǵy alǵashqy jeńisińiz esińizde me?

- Meniń alǵashqy týrnırim 12 jasymda ótti. Bul qala birinshiligi bolatyn. Ol kezde qatelespesem úshinshi oryn aldym.

- Siz sondaı-aq qazaq kúresinen týrnırlerge qatysyp júrsiz, Sizge qaısysy jaqyn: dzıýdo ma, álde qazaq kúresi me?

- Bul suraqqa jaýap berý ońaı emes. Kez kelgen sporttyń ózindik qıyndyqtary bar.Meniń qazaq kúresinen góri dzıýdodan tájirıbem mol. Qazaq kúresi erejeler men baǵalaý turǵysynan óte qıyn. Sondyqtan, maǵan qazaqstandyq deńgeıde sporttyń osy túrinen óner kórsetý qıynyraq.

- Alǵa qoıǵan josparyńyz bar ma?

- Men Tokıoda ótetin jazǵy Olımpıadaǵa daıyndaldym. Ózderińiz bilesizder ol pandemııaǵa baılanysty 2021 jylǵa aýystyryldy. Endi kóremiz, áli birneshe jarystar bar. Men jaraqat alǵam, qazir emdelip jatyrmyn. Jaraqatyma baılanysty Olımpıadaǵa bara almaýym da múmkin. Jattyǵýdy jalǵastyramyn.

- Sizdiń basty maqsatyńyz - Olımpıada oıyndarynda altyn alý ma?

- Olımpıada oıyndarynda altynyn alý - ár sportshynyń maqsaty. Ókinishke oraı, oǵan báriniń qoly jete bermeıdi. Bári Allanyń qalaýymen bolady. Eger men Olımpıadanyń altynyn almasam, onda maǵan qazaq kúresinen «Qazaqstan Barysy» týrnırinde jeńiske jetý kerek.

- Bıyl Táýelsizdigimizge 30 jyl. El turǵyndaryna qandaı tilek aıtasyz?

- Men barsha qazastandyqtarǵa jáne memleketimizge odan ári damyp, órkendeýdi tileımin. Qazaqstannyń atyn álemge tanytatyn chempıondar men batyrlar kóp bolsyn. Eń bastysy densaýlyq tileımin!

-Áńgimeńizge rahmet!