Olımpıada aldynda boksshylar úılerine tarap ketti – Bas bapker Aıtjanov

<p>ASTANA. KAZINFORM &mdash; Osy jyldyń basty dodasy Parıj Olımpıadasynyń aldynda boksshylar bir aptaǵa demalyp, tynyǵý úshin úılerine tarap ketti.</p>

Bul týraly kazinform tilshisine bokstan ulttyq quramanyń bas bapkeri Myrzaǵalı Aıtjanov aıtty.

«Biz osyǵan deıin Almaty oblysyndaǵy «Aqbulaq» olımpıadalyq ortalyǵynda jattyǵý jıynyn sátti ótkizdik. Jigitterimiz naǵyz babynda dep oılaımyn. Keshe ǵana barlyq boksshylardy bir aptaǵa úılerine taratyp jiberdim. Olar da Olımpıada aldynda ózderiniń otbasynda, ata-anasynyń qasynda demalyp, tynyǵyp alsyn dedik. Bir aptadan keıin qaıta jınalamyz. Olımpıadaǵa sońǵy daıyndyqty Túrkistan oblysyndaǵy «Alma taý» bazasynda 9-21 shilde aralyǵynda ótkizýdi josparlap otyrmyz», - dedi Myrzaǵalı Qulanuly.

Sonymen qatar, Olımpıada oıyndarynda ońaı qarsylas joq ekenin, dese de, júlde úshin shákirtteri aıanyp qalmaıtynyn atap ótti.

«Olımpıada oıyndaryna álemniń eń úzdik boksshylary barady. Ol jerge baratyn boksshylar ońaı shaǵyla qalatyn jańǵaq emes. Sondyqtan, ár jekpe-jek ońaı bolmasy anyq. Dese de, biz júldege talasýǵa, Olımpıadanyń jeńis tuǵyrynan kórinýge bar kúshimizdi salamyz. Basty maqsatymyz – keminde bir altyn alý», - dedi bas bapker Myrzaǵalı Aıtjanov. 

Esterińizge sala keteıik, Olımpıada oıyndarynda erler quramasynan Sáken Bıbosynov (51 keli), Mahmud Sabyrhan (57 keli), Muhamedsabyr Bazarbaıuly (63,5), Aslanbek Shymbergenov (71), Nurbek Oralbaı (80 keli) Aıbek Oralbaı (92 keli) jáne eń aýyr salmaq dárjesi boıynsha Qamshybek Qońqabaev el namysyn qorǵaıdy. 

Parıj Olımpıadasy 26 shilde men 11 tamyz aralyǵynda ótedi.