Olıgarhtardy aýyzdyqtap, shetelge zańsyz ketken kapıtaldy qaıtarý óte mańyzdy - Erlan Saırov
«Olıgarhtarǵa «áı deıtin áje, qoı deıtin qoja» bolmady. «Dúnıejúzilik banktiń» esebi boıynsha, Qazaqstan halqynyń 15% kedeı sanatynda. Eski júıeniń «áleýmettik ádiletsizdik» faktileri, halyqty saıasattan shektetý tendentsııasy memleketti, qoǵamdy, jurtty «Qasiretti qańtarǵa» ıtermeledi, jaqyndatty. 2019 jyly Qazaqstanda bılik aýysty. Prezıdent Qasym-Jomart Toqaev bılikke kelgen kúni «demokratııa men plıýralızm bolmaı, Qazaqstanda turaqty ekonomıkalyq damýdy qalyptastyrý múmkin emes» dep málimdedi. Osy oraıda evolıýtsııalyq turpattaǵy saıası reformalar bastaldy. Ulttyq Keńes quryldy, jańa turpattaǵy «Mıtıngiler» jónindegi zań qabyldandy», - dedi depýtat Májilistiń jalpy otyrysynda qańtar oqıǵasy taqyrybyn talqylaý kezinde
Onyń paıymynsha, elimizdegi reformalarǵa qarsy toptar qalyptasty.
«Sonymen birge, kóptegen jyldar buryn josparly túrde Konstıtýtsııaǵa jasalǵan álimjettilik nátıjesinde, zamanaýı logıkaǵa sáıkes kelmeıtin, qosarlanǵan ınstıtýt qalyptasyp, kúshtik qurylymdar Úkimettiń jumysyna jónsiz aralasty. Sonyń nátıjesinde quqyq qorǵaý, Ulttyq qaýipsizdik organdarynda Konstıtýtsııaǵa, reformalarǵa qarsy toptar qalyptasty. Osy kertartpa kúshter lıgıtımdi Prezıdentke qarsy «zagovor» daıyndady. «Qasiretti qańtar» legıtımdi Prezıdent Qasym-Jomart Toqaevqa qarsy reaktsıoner kúshterdiń «memlekettik tóńkeris» áreketi», - dedi E. Saırov.
Onyń aıtýynsha, qańtarda azamattardyń beıbit, ádil talaptaryn revanshıster óziniń elge, halyqqa qarsy jaman pıǵylyna paıdalanyp ketti. Reaktsıonerlerdiń ekstremıstik arandatý is-áreketteriniń kesirinen jappaı tártipsizdikke jol berildi, memlekettik organdarǵa qarýly shabýyl jasaldy, Almaty men basqa da qalalar qara túnekke batty.
«Qańtar kezinde Qasym-Jomart Toqaevtyń batyl, ótkir is-áreketteriniń nátıjesinde Qazaqstannyń terrıtorııalyq tutastyǵy men myzǵymastyǵy saqtaldy. «Qasiretti Qańtar» tárizdi tragedııa qaıtalanbaýy tıis! Ne isteý kerek? Bizge zań men tártip qajet! Bizdiń Qazaqstannan basqa Otanymyz, qutty mekenimiz joq! Kvazımemlekettik sektor resýrstaryn baqylaýdyń senimdi tetikterin jasaý, olıgarhtardy aýyzdyqtaý, shetelge zańsyz ketken kapıtaldy qaıtarýdy tezdetý óte mańyzdy», - dedi Erlan Saırov.
«Prezıdent Toqaevtyń saılaýaldy baǵdarlamasynda halyqty kedeıliktiń «shynjyrynan» shyǵarý joldary qarastyrylǵan.
Aýyldarda halyqqa úı sharýashylyqtaryn damytý úshin 1 mln adamdy qamtıtyn 1 trln teńge bólinedi, aldaǵy jeti jylda 111 mln sharshy metr úı salynyp, 3,3 mln adam jumyspen qamtylýy tıis. Bul máseleni Úkimet sapaly, júıeli oryndaýy tıis», - dedi depýtat.