Ólgen mal ıeleri ótemaqy alý úshin tek resmı komıssııaǵa júginýi kerek – AShM

<p>ASTANA. KAZINFORM &ndash; QR Aýyl sharýashylyǵy mınıstrliginiń resmı ókili Oljas Tilebaldın sý tasqyny saldarynan ólgen mal qunyn óteý algorıtmin túsindirdi.</p>

Onyń aıtýynsha, menshik ıesin anyqtaý úshin maldyń sáıkestendirý nómiri (bırka, tańba jáne t.b.) derekqorymen salystyrylady. Al tirkelmegen jaǵdaıda kýágerlerdi tarta otyryp, zalaldy óteý jónindegi komıssııanyń aktisi toltyrylady.

«Mal ıelerine ótemaqy bıýdjet qarajatynan da, bıýdjetten tys kózderden de tólenedi. Ieler jergilikti jerdegi zalaldy óteý jónindegi komıssııaǵa ótinish jasaýy tıis. Barlyq ótinimdi jergilikti ákimdikter qurǵan resmı komıssııalarǵa ǵana berý qajet. Sonda ǵana ótemaqy tólenedi», - dedi spıker Respýblıkalyq aqparattyq shtabta ótken brıfıngide.

Derekter jınaýmen aınalysatyn ártúrli shtabtarǵa usynylǵan aqparat tólem úshin negiz bolyp sanalmaıdy.

«Qazirgi ýaqytta Qaraǵandy oblysynda aýyl sharýashylyǵy janýarlary boıynsha zalal tolyǵymen óteldi. Qostanaı oblysynda bul jumys bastalyp, búgingi tańda 268 mal basy boıynsha tólem júrgizildi, basqa ótinimder boıynsha jumys jalǵasýda», - deıdi O.Tilebaldın.

Sý tasqyny kezinde aýyl sharýashylyǵy salasy boıynsha qosymsha suraqtar týyndaǵan jaǵdaıda, QR AShM janyndaǵy «jedel jelige» habarlasýǵa bolady.

Jedel jeli jumysy 9.00-den 18.30-ǵa deıin (7172)573358, 87470943381 nómirleri boıynsha isteıdi.

Sonymen qatar pavodki_kz_bot telegramm-boty táýlik boıy jumys isteıdi.