«Oqjetpes» shıpajaıynyń qyzmetkerleri kólik keptelisi jumysty tejeıtinine shaǵymdandy

NUR-SULTAN. QazAqparat – Jaz mezgilindegi kólik keptelisi Býrabaıdaǵy «Oqjetpes» shıpajaıynyń jumys kestesine kesirin tıgizip otyr. Bul týraly QR Prezıdentiniń Іs basqarýshysy Aıbek Dadebaevtyń atalǵan uıym qyzmetkerlerimen kezdesýinde aıtyldy, dep habarlaıdy QazAqparat.

Şýche-Býrabaı kýrorttyq aımaǵynda ornalasqan QR Prezıdenti Іs Basqarmasy Medıtsınalyq ortalyǵynyń «Oqjetpes» emdeý-saýyqtyrý kesheninde ótken kezdesýde birqatar ózekti másele kóterildi.

«Mysaly, jaz mezgilindegi kólik keptelisi – shıpajaıdyń jumys kestesine kesirin tıgizip jatyr. Sondyqtan, trassadaǵy shlagbaýmdarǵa aldyn ala tólem jasaıtyn sekildi onlaın termınal Býrabaıda da ornatylsa degen usynys tústi. Sonymen qatar, ujym ókilderi qyzmettik kólikterdi jańartý, jumysshylardy qyzmettik baspanamen qamtamasyz etý jaǵyn da tilge tıek etti», - deıdi Aıbek Dadebaev.

Áńgime barysynda shıpajaıda demalýshylardyń jıi qozǵaıtyn saýaldary da nazardan tys qalmady. Sonyń ishinde – qyzmet sapasy.

«Osy jáne ózge de máselelerdi qoryta kele, shıpajaıdy halyqaralyq standarttarǵa sáıkestendirý – ýaqyt talaby ekenin ańǵarýǵa bolady», - dep tolyqtyrady QR Prezıdentiniń Іs basqarýshysy.

Aıta ketsek, keshenniń medıtsınalyq qural-jabdyqtary josparly túrde jańartylyp turady jáne barlyǵy da qoldanysta. Byltyr jańadan 5 jabdyq satyp alynǵan. Bıyl taǵy 4 qural alý josparlanyp otyr. Sondaı-aq, shıpajaıdaǵy 20 bólme jyl aıaǵyna deıin jóndelmek.

Vıdeodan alynǵan kadr