«Oqjetpes» emdeý-saýyqtyrý kesheni jylyna 10 myńnan astam adamdy qabyldaıdy
– Áńgimemizdiń álqıssasyn «Oqjetpes» shıpajaıy qashan ashyldy, sodan bastasaq...
– Eurospa standarty boıynsha úzdik dep tanylǵan «Oqjetpes» emdeý-saýyqtyrý kesheniniń irgetasy qalanǵanyna bıyl 60 jyl, al halyqqa qyzmet kórsetip jatqanyna 58 jyl tolady. Shıpajaıdyń tarıhyna keletin bolsaq, 1965 jyldan jumysyn bastady. Bul nysan týraly aýyz toltyryp aıta berýge bolady. Degenmen, «Oqjetpes» ataýy shıpjaıǵa 1982 jyly jańa jeti qabatty jaıly bólmeleri bar jatyn ǵımaraty salynǵannan keıin berildi. Búgingi kúni bul ataý emdeý-saýyqtyrý kesheniniń brendine aınaldy.
– Shıpajaı qandaı qyzmetter kórsetedi, jylyna qansha adam kelip emdeledi?
– «Oqjetpes» emdeý-saýyqtyrý kesheni – jyl boıy qyzmet kórsetetin klımattyq balneologııalyq keshen. Qazirgi zamanǵy emdeý-dıagnostıkalyq bazamen tolyqtyrylǵan tabıǵı biregeı faktorlar: qaraǵaı ormanynyń ekologııalyq taza aýasy, Balpash sor kóliniń emdik balshyǵy jáne Maı Balyq kóliniń mıneraldy sýy, radondy terapııa, qymyzben emdeý, «Qulager – Arasan» mıneraldy sýy júrek-tamyr júıesi, tynys alý músheleri, tirek-qımyl apparaty, asqorytý, qan aınalymy, endokrındi jáne júıke júıesi aýrýlaryn, ýrologııalyq jáne gınekologııalyq aýrýlardy emdeýge jáne ońaltýǵa múmkindik beredi.
Sanatorııdiń basty basymdyqtarynyń biri – kórsetiletin qyzmetterdiń sapasyn arttyrý. Qazirgi ýaqytta «Oqjetpes» emdeý-saýyqtyrý kesheni jyl boıy qyzmet kórsetedi jáne nysanda demalýshylarǵa arnalǵan jaıly 125 bólme bar. Shıpajaıda barlyǵy 242 personal qyzmet kórseti, olardyń barlyǵy ózi isiniń sheberleri. Jyl saıyn shamamen 10 myńnan astam adam saýyqtyrý demalysyna keledi.
- Bul keshende kimder emdele alady?
- Elimizdiń kez kelgen azamatynyń bizdiń shıpajaıda demalýyna bolady. Sonymen birge, sheteldikter de kelip demalady, olar úshin bizde baǵa qoljetimdi. Olar osynda demalyp qana qoımady, emdelip qaıtady. Sol jaǵynan alǵanda óte tıimdi. Sol sebepti, bizdiń shıpajaıdy qonaqúılermen múldem salystyrýǵa bolmaıdy.
- Al osy shıpajaıdyń densaýlyqty ońaltýdaǵy biregeıligi nede?
- Bizdiń shıpajaılardyń artyqshylyǵy qyzmet kórsetý biregeıliginde. Kelgen adamdar ózderin dál úılerinde jatqandaı sezinedi. Bul – bizdiń qyzmet kórsetetin personaldyń kásibıligi men emdeý bazasyna baılanysty, árıne. Bizdegideı emdeý sharalary men jabyqtardy elimizdegi ózge shıpajaılardan kezdestirmeısiz. Sol jaǵynan alǵanda, «Oqjetpes» emdeý-saýyqtyrý kesheni elimiz boıynsha biregeı shıpajaı sanalady.
– Bir adamnyń ǵumyryndaı tarıhy bar «Oqjetpes» emdeý-saýyqtyrý kesheniniń jetistikteri qandaı?
– 2017 jyldyń 27 shildesinen bastap, Qazaqstan Respýblıkasy Prezıdenti is basqarmasy medıtsınalyq ortalyǵynyń emdeý-saýyqtyrý keshenderi «Oqjetpes» brendimen biryńǵaı jelige birigip, quramyna Býrabaı kýrorttyq aımaǵyndaǵy «Oqjetpes», Almaty qalasyndaǵy «Almaty Resort» jáne RF Essentýkı kýrort-qalasyndaǵy «Qazaqstan» shıpajaıy kirdi. 2006 jyly Andorrda Dúnıejúzilik sýmen jáne klımatpen emdeý federatsııasynyń Bas Assambleıasymen sanatorııalyq-kýrorttyq emdeýdi uıymdastyrýdaǵy jetistikteri jáne Dúnıejúzilik densaýlyq saqtaý uıymdarynyń arasynda belsendi ǵylymı jumystary úshin «Oqjetpes» ESK-ne «Álemdegi eń úzdik kýrort» marapaty tabys etildi.
2011 jyly sanatorıı menshikti bulaqtyń radondy sýyn paıdalaný arqyly jańa medıtsınalyq qyzmet kórsetý – radondy terapııany engizdi. 2012 jyly mamyrda Londonda (Ulybrıtanııa) Brıtan ınstıtýty dırektorlarynyń sheshimimen bizdiń emdeý-saýyqtyrý kesheni «Eýropalyq sapa» halyqaralyq marapatqa ıe boldy. 2019 jyly «Úzdik shıpajaı» marapatyna ıe bolyp, Qazaqstan shıpajaılary arasynda alǵash EuroSpa sertıfıkatyna ıe bolǵan keshen búginde 13 ońaltý baǵdarlamasy men túrli baǵytta jumys istep keledi. «Oqjetpeste» halyqaralyq standarttarǵa sáıkes sapa menedjmentiniń júıesi bar. 2014 jyly jyl saıyn rastaıtyn «4 juldyzdy qonaq úı» jáne «Joǵary sapaly meıramhana» sanatyna sáıkestik sertıfıkatyn aldy.
Ótken jyly Prezıdent Іs basqarmasy Medıtsınalyq ortalyǵynyń «Oqjetpes» emdeý-saýyqtyrý kesheni Ulttyq kýrorttyq qaýymdastyǵynyń sheshimimen «Jyldyń úzdik shıpajaıy» atandy.
- Ózge emdeý-saýyqtyrý keshenderinen mamandar kelip tájirıbe almasa ma, sondaı-aq qazirgi stýdent, erteńgi mamandardyń tájirıbeden ótýine múmkindik bar ma?
- Biz elimizdegi iri medıtsınalyq joǵary oqý oryndarymen tyǵyz baılanysta ornatqanbyz. «Almaty» shıpajaıy Almaty qalasyndaǵy joǵary oqý oryndarymen, «Oqjetpes» shıpajaıy Astanadaǵy medıtsınalyq ýnıversıtet jáne jergilikti medıtsınalyq kolledjdermen jumys isteıdi. Stýdentteriniń bizde tájirıbeden ótýi úshin kelisimshart jasastyq, sol sebepti teorııalyq bilimderin tájirıbede shyńdaı alady.
– «Oqjetpes» emdeý-saýyqtyrý keshenin damytý boıynsha aldaǵy josparlaryńyz qandaı? Prezıdenttiń is basqarmasyna qarasty shıpajaılar jelisin keńeıtý oıda bar ma?
– Bıyl bizde bólmelerge kúrdeli jóndeý jumystaryn júrgizýdi josparlanǵan. Sonymen birge, emdeý korpýsyn keńeıtý jáne jańa zamanýı jabdyqtaryn satyp alý josparda bar. Osy sharalar emdeý-saýyqtyrý boıynsha qyzmet sapasyn arttyrýǵa jáne emdelýshiler saýlyǵyna oń yqpal etedi dep úmittenemiz. Bul – bizdiń basty maqsatymyz.
Iá, shıpajaılar jelisin keńeıtý josparda bar. Qazirgi ýaqytta Qyrǵyzstan Respýblıkasyndaǵy «Qazaqstan» shıpajaıyn jańartý boıynsha jobalyq-smetalyq qujattamalary ázirlenip jatyr. Sonymen birge, Saryaǵashta shıpajaı salý nemese jańartý jobasy josparlanǵan. Osyndaı joba Shyǵys Qazaqstan oblysynda da qarastyrylyp jatyr. Osy arqyly shıpajaılar jelisi keńeıe túsedi.
– Áńgimeńizge raqmet!