Oqytýshylar jappaı aǵylshyn tili testinen ótedi - Aıman Musaqojaeva
"Búgingi talapqa sáıkes, biz aǵylshyn tilin bilý deńgeıin anyqtaıtyn testti ótkizýimiz kerek. Oǵan professor-oqytýshylardyń barlyǵy qatysady. Bizdegi pánderdiń 30 protsenti aǵylshyn tilinde berilýi kerek. Naýryz aıynda biz aǵylshyn tilindegi kýrstardy bastaǵan bolatynbyz. Barlyq oqytýshylardy osy kýrstarǵa qatysýdy suraımyn. Sebebi maýsym aıynda jappaı testileý bastalady. Soǵan qaraı aǵylshyn tilin bilý deńgeıi anyqtalady. Al tıisti deńgeıge saı kelmeıtinderdiń ýnıversıtette jumys isteýge múmkindigi bolmaıdy", - dedi A.Musaqojaeva mýzyka qaıratkerleriniń jınalysynda.
Rektordyń aıtýynsha, oqý quraldary qazaq jáne orys tilderinde qalaı jazylsa, týra solaı aǵylshyn tilinde de jazylýy kerek. Negizgi meje - 30 protsent pánderdiń aǵylshyn tilinde berilýi.
Aıta keteıik, búginde jıynda mýzyka qaıratkerleriniń odaǵy aldaǵy prezıdenttik saılaýǵa qatysty óz ustanymyn bildirdi. A.Musaqojaevanyń aıtýynsha, Memleket basshysy Qasym-Jomart Toqaevtyń kezekten tys prezıdenttik saılaýdy ótkizýge qatysty sheshimi oryndy. Sebebi xalyq óz qalaýyn bildirip, Prezıdentti saılap alýy qajet.
"Konstıtýtsııa boıynsha Elbasy óziniń ókilettiligin Senat tóraǵasyna tapsyrdy. Al 9 sáýirde Memleket basshysy Qasym-Jomart Kemeluly Toqaev kezekten tys prezıdenttik saılaýdy 9 maýsymda ótkizý týraly jarlyqqa qol qoıǵan bolatyn. Ata zańymyzǵa sáıkes, Qazaqstannyń Prezıdentin xalyq saılaıdy. Elimizdiń árbir azamaty daýys berý arqyly óz kandıdatyn tańdaýǵa quqyly. Sondyqtan Prezıdent saılaýyna baryp, óz tańdaýymyzdy jasaýymyz qajet", - deıdi A.Musaqojaeva.