Oqýshynyń dinı ustanymyn durys qalyptastyrý mańyzdy – Nurbolat Aıekeshov
Maman retinde dintanýshy, qalalyq Qoǵamdyq damý basqarmasynyń «Monıtorıng jáne taldaý» ortalyǵynyń bólim basshysy Nurbolat Aıekeshov shaqyryldy.
Jalpy 150 astam oqýshy qatysqan kezdesýde destrýktıvti aǵymdar, saldary, qaýpi týraly aıtyldy.
«Qazaqstan zaıyrly memleket. Memlekettiń qareketteri azamattyq zań normalarymen rettelinedi de din isterine aralaspaıdy. Al dinniń tirshiligi dinı normalarmen rettelinedi, ol memleket jumysyna aralaspaıdy. Konstıtýtsııada kórsetilgen ar men ujdan bostandyǵy talaptary adamdy senimine jáne kózqarasyna baılanysty qýdalaýǵa tyıym salady. Alaıda din normalary men tájirıbesi azamattyq zań normalaryna qaıshy kelmeýi kerek. Bizdiń memlekettik mektepterde óziniń erejeleri bar. Onyń biri - mektep formasynyń úlgisi. «Hıdjab» degen dinı marker. Mınıstrliktiń biregeı forma kııý týraly ortaq talaby bar. Eń aldymen sizder úshin dinı markerdi kórsetý emes, bilim alýlaryńyz mańyzdy. Dinı qyzyǵýshylyqtardyń arty fanatızmge aparady. Ár qadamdaryńyzdy abaılap, kez kelgen resýrstardan aqparat izdemeý kerek», - dedi Nurbolat Aıekeshov.
Oqýshylar tarapynan dinı nanym-senimge qatysty birqatar suraqtar qoıyldy.
Onyń ishinde bir oqýshy dáris berýshilerdiń kelý maqsatyn surady.
«Esterińizde bolsa Rýslan Kýlekbaev atys jasady. Ol jigit mektep jasynan bastap dinı aǵymdarǵa kirgen. Sizderdiń bolashaq ıdeıalaryńyz, dúnıetanymdaryńyz, kózqarastaryńyz mektep jasynan qalyptasady. Terrorıster aıaq astynan ósip shyqpaıdy. Mektep jasynan bastap balalarda ustanym paıda bolýy múmkin. Atyraýdaǵy, Aqtóbedegi atystar soǵan dálel. Sol sebepti sizdermen kezdesip, durys baǵyt-baǵdar berip, jat aǵymdardyń yqpaly týraly maǵlumat berý – memleket júrgizip otyrǵan saıasattyń údesinen shyǵady. Sol sebepti, oqýshynyń dinı ustanymyn durys qalyptastyrý mańyzdy», - dedi Nurbolat Aıekeshov.
Oqýshy jasyndaǵy balalardyń sanasynda san suraq týyndaýy múmkin. Keıde bul suraqtarǵa dinı bilimi joq bolsa, ata-analar da, muǵalimder de jaýap bere almaýy yqtımal.
Osy oraıda, byltyr qalalyq Qoǵamdyq damý basqarmasynyń uıymdastyrýymen, qoldaýymen «Monıtorıng jáne taldaý ortalyǵy» muǵalimderdiń biliktiligin arttyrý kýrstaryn júrgizilgen bolatyn.
«Qazir dintaný sabaǵy fakýltatıvti túrde 9-synyptarda ótedi. Bul sabaqty byltyr biliktiligin arttyrǵan tarıhshy mamandar ótkizedi. Byltyrǵy kýrstarda ustazdar tek qana teorııalyq bilim almaı túrldi dinı oryndarǵa baryp, olardyń tarıhymen tanysqan bolatyn», - dedi dintanýshy maman.
Dáristiń sońynan teris aǵymdardyń yqpaly jóninde arnaıy vıdeofılm kórsetildi.