Oqýshylarǵa arnalǵan Baıqońyrǵa saparlaý týry iske qosylady
«Osydan 5 jyl buryn mektep týrlaryn ázirleı bastadyq. Bul baǵytta tanymal tulǵalardy tarta bastadyq. Búginde bul bastamany ákimdikter qolǵa aldy. Qazir Baıqońyrǵa oqýshylar týryn ázirlep jatyrmyz. Týrızmdi ilgeriletýde mektepter de ashyq bolýy kerek. Oqýshylarǵa arnalǵan týrlardy uıymdastyrýda biz qaýipsiz, akkredıttelgen jáne tájirıbesi jetkilikti týroperatorlardy tartýǵa daıynbyz. Bul jerde balalardyń ekologııalyq saýatyn asha túsý máselesi de sheshimin tabady. Mysaly, Torysh ańǵarynda tas urlanǵan. Bul jerde másele jalpy mádenıettiń joqtyǵy. Osy oraıda balalarǵa erte jastan jón silteý kerek. Ol týraly únemi aıtý kerek, bul jerde urlanǵan tastyń geologııalyq qundy dúnıe ekenin aıtý jetkiliksiz», - dedi Qaırat Sádýaqasov.
Onyń aıtýynsha, jyl saıyn 15 myń jas qazaqstandyq týrızm týraly dáris alady.
«Kelesi aıda biz akkredıttelgen týroperatorlar tobymen Baıqońyrǵa baramyz. Onda oqýshylarǵa arnalǵan týrlardy qalaı ótkizý keregin qarastyramyz. Bıyl mamyrda biz zymyran ushyrý sátine kýá boldyq. Onda barýdyń jeńil joldary bar. Jalǵa berilgen aımaq bolǵandyqtan keıbir kedergiler boldy. Endi ol ońaıǵa túsedi, sebebi ǵarysh aılaǵynyń jekelegen alańdary Qazǵaryshqa beriledi. Bıyl oqý jylynyń basynda oqýshylarǵa qyzyqty týr usynamyz dep oılaımyn. Bul jerde Oqý-aǵartý mınıstrliginiń birlesýi óte mańyzdy. Olar balalarǵa qyzyqty sabaqtar uıymdastyrý jaǵynan qol ushyn sozýy kerek. Sondaı-aq iske týroperatorlardy tartqan jón», - dedi spıker.
Sondaı-aq spıker týrdy uıymdastyrýda balalardyń qaýipsizdigi jáne týroperatorlarǵa artylatyn jaýapkershilik týraly aıtty.
«Týr kezinde balalarmen tótenshe jaǵdaı bolyp qalsa, sol úshin bul jerde jaýapty bireý bolýy kerek. Osy oraıda normatıvtik-quqyqtyq aktiler arqyly týroperatorlarǵa qosymsha jaýapkershilik belgileýge daıynbyz. Týroperatorlar jaýapkershilikten qashpaıdy. Olar buǵan deıin de dárigerler, muǵalimderdiń qatysýymen týrlar uıymdastyryp keledi. Bul mindetti oryndaý úshin sýbsıdııa qajet», - deıdi Qaırat Sádýaqasov.