Oqýshylardyń ystyq tamaǵyna bólingen aqshaǵa Qostanaı oblysynda azyq-túlik taratylýda

QOSTANAI.QazAqparat –Qostanaı oblystyq Bilim basqarmasy Instagram-daǵy paraqshasynda az qamtylǵan otbasylardan shyqqan oqýshylardy tamaqtandyrýǵa qatysty aqparat jarııalady, dep habarlaıdy QazAqparat tilshisi.

«2019-2020 oqý jylynyń 4-toqsanynda qashyqtan oqytý kezeńinde oblystyń 10 óńirinde 7 267 balaǵa tegin tamaqtandyrýdy uıymdastyrýdyń ornyna 31 mln teńgege azyq-túlik sebetteri berildi. Áleýmettik turǵyda qorǵalmaǵan balalardy qoldaý jáne tegin ystyq tamaq alý quqyqtaryn qamtamasyz etý maqsatynda oblystyń barlyq óńirlerinde jappaı oqytý qorynyń qarajaty esebinen azyq-túlik jıyntyǵyn berý týraly sheshim qabyldandy», - delingen vedomstvo aqparatynda.

Sonymen, azyq-túlik sebetterin kelesi sanattaǵy oqýshylar alady:

1) memlekettik ataýly áleýmettik kómek alýǵa quqyǵy bar otbasylardan shyqqan balalar;

2) memlekettik ataýly áleýmettik kómek almaıtyn, jan basyna shaqqandaǵy tabysy eń tómengi kúnkóris deńgeıiniń shamasynan tómen otbasylardan shyqqan balalar;

3) jetim balalar jáne ata-anasynyń qamqorlyǵynsyz qalǵan balalar;

4) tótenshe jaǵdaılardyń saldarynan shuǵyl járdemdi talap etetin otbasylardan shyqqan balalar;

5) bilim berý uıymynyń alqaly organy aıqyndaıtyn bilim alýshylar men tárbıelenýshilerdiń ózge de sanattary.

Búginde oblystyń 20 óńirindegi mektepterdiń 13 myń oqýshysy men tárbıelenýshileriniń ata-analarynan ótinishter qabyldandy. Áýlıekól, Amangeldi, Qamysty, Qarabalyq, Qarasý aýdandarynda, Qostanaı, Lısakov jáne Rýdnyı qalalarynda 3 myńǵa jýyq azyq-túlik sebeti taratyldy. Oblys ortalyǵynda osy jyldyń 30 qazanyna deıin 1733 oqýshy azyq-túlik sebetin alatyn bolady.