Oqýshylardyń kerek-jaraǵyn alýǵa beriletin qarjylaı kómek ata-ananyń shotyna aýdyrylady
Oqý-aǵartý mınıstrliginiń Facebook paraqshasynda jarııalanǵan aqparatqa sáıkes,
«Jalpyǵa mindetti bilim berý» qory aıasynda 300 myńnan astam oqýshy qarjy aldy. Qarjylaı kómek 475 myń balaǵa kórsetiledi.
«Oqý-aǵartý mınıstri bilim basqarmalarynyń basshylarymen kezdesýde tólemderdi 23 tamyzǵa (qosa alǵanda) deıin aıaqtaý týraly tapsyrma berdi. Bıyldan bastap Oqý-aǵartý mınıstrligi qarjylaı kómek kórsetý erejelerine ózgerister engizdi. Eger buryn óńirlerde bólingen soma 17 myńnan 40 myńǵa deıin bolsa, bıyl bul soma ulǵaıtylyp, keminde 37 389 teńgeni quraıdy», - dep atap ótedi mınıstrlikten.
Vedomstvo málimetinshe, kómek berý tetigine de ózgerister engizildi. Endi ata-analarǵa qarjy balalarymen birge mektep formasyn, aıaq kıimin, keńse taýarlaryn jáne taǵy basqalaryn óz betinshe tańdaı alýy úshin banktegi shotyna aýdarylady. Buǵan deıin munyń barlyǵyn ákimdikter satyp alatyn jáne taýardyń ólshemine, sapasyna jáne basqa da jaıtqa qatysty máseleler týyndaıtyn.
«Endi ata-analar ózderiniń banktegi shotyna aqshany tikeleı alyp, balalaryna mektep formasyn, keńse taýarlaryn jáne aıaq kıimin óz betinshe tańdaı alady. Munyń artyqshylyǵy - bala ata-anasymen birge tańdaǵan kıimmen mektepke bara alýynda. Buǵan deıin satyp alýmen ákimdikterdiń qyzmetkerleri aınalysatyn. Keıde kıimniń ólshemine, sapasyna qatysty problemalar týyndaıtyn. Qazir ákimdikter qarajat aýdarýdy aıaqtap jatyr. 37 389 teńge – eń tómengi soma. Jergilikti atqarýshy organdar kórsetilgen kómek kólemin kóbeıte alady, biraq ony azaıtýǵa quqyǵy joq. Keıbir ákimdikter bul somadan artyq qarjy bólip jatyr, mysaly, Almaty 43 myń teńgeden. Biz muny tek qup kóremiz», - dedi Oqý-aǵartý mınıstrligi Balalardyń quqyqtaryn qorǵaý komıteti tóraǵasynyń orynbasary Dýlat Jekebaev.
«Jalpyǵa mindetti bilim berý» qorynan ataýly áleýmettik kómek alatyn otbasylardyń balalaryna, sondaı-aq AÁK almaıtyn, biraq jan basyna shaqqandaǵy ortasha tabysy eń tómengi kúnkóris deńgeıinen tómen otbasylardyń balalaryna, jetim balalarǵa jáne ata-anasynyń qamqorlyǵynsyz qalǵan balalar, tótenshe jaǵdaıǵa tap bolǵan oqýshylar jáne taǵy basqalaryna kómek kórsetiletinin eske sala keteıik.