Oqýshylardyń 10%-y elektrondy temeki nemese veıp tartady – mınıstrlik

ASTANA. QazAqparat – Elimizde oqýshylardyń 10%-y túrli temeki ónimderine qumarlyq tanytady. Olardyń sany 13-15 jastaǵy jasóspirimder arasynda eki ese artady. Bul týraly densaýlyq saqtaý vıtse-mınıstri Vıacheslav Dýdnık málim etti, dep habarlaıdy QazAqparat tilshisi.

«Bizdiń mınıstrlik erekshe mán beretin mańyzdy bloktyń biri balalar men jasóspirimder arasyndaǵy semizdik pen temeki tartý máselesi. «Salaýatty ult» ulttyq jobasy aıasynda oqýshylar arasynda densaýlyq saqtaý boıynsha zertteý júrgizildi. Aıta ketsek, elimizde oqýshylardyń 10%-y elektrondy temeki nemese veıp tartady», - dedi Vıacheslav Dýdnık ortalyq kommýnıkatsııalar qyzmeti alańynda ótken brıfıngte.

Vıtse-mınıstrdiń málimdeýinshe, 13-15 jastaǵy jasóspirimder arasynda temeki, veıpke qumarlyq eki ese artady.

«Bizdiń mınıstrlik zańnamany jetildirý boıynsha aýqymdy aqparattyq-túsindirý jumystaryn júrgizýde. Ózderińiz biletindeı, Úkimet temeki ónimderine qatysty aktsızder máselesin qarastyryp jatyr. Sondaı-aq, elimizde veıpke tyıym salý máselesi de talqylanýda», - deıdi ol.

Buǵan deıin atalǵan vedomstvo oqýshylar densaýlyǵyn jıi mazalaıtyn patologııalyq problemadardy ataǵan edi.