Oqýshylardy teatr ónerine tartýǵa arnalǵan pılottyq joba iske qosyldy

NUR-SULTAN. QazAqparat – Nur-Sultan jáne Almaty qalasynda «Balalar men teatr» atty aǵartýshylyq pılottyq jobasy iske qosyldy. Bul týraly QR Bilim jáne ǵylym mınıstrligi mektepke deıingi jáne orta bilim komıtetiniń tóraǵasy Gúlmıra Kárimova málim etti, dep habarlaıdy QazAqparat tilshisi.

«Óskeleń urpaqty teatr ónerine tartý maqsatynda arnaıy usynymdar ázirlendi. Onda oqýshylardyń teatrlarǵa tegin jáne jeńildikpen barýy qarastyrylǵan. Nur-Sultan jáne Almaty qalasynda jergilikti bıýdjet esebinen oqýshylardy jeńildetilgen teatr abonementimen qamtamasyz etý boıynsha «Balalar men teatr» aǵartýshylyq pılottyq jobasy iske qosyldy. Mysaly, Nur-Sultan qalasynda atalǵan joba aıasynda 7 myńǵa jýyq oqýshy teatrǵa bardy. Osy jobany odan ári jalǵastyrý maqsatynda Nur-Sultan qalasynyń bilim jáne mádenıet basqarmasy ekijaqty memorandýmǵa qol qoıdy», - dedi Gúlmıra Kárimova QR Bilim jáne ǵylym mınıstrliginiń apparattyq jınalysynda.

Komıtet basshysynyń aıtýynsha, balalardy ónerge baýlý baǵytyndaǵy jumys jalǵasady.

«Búgingi tańda «Astana opera» teatryna 300 oqýshy tegin bardy. Bul jumys jazdygúni jalǵasyn tabady. Al Almaty qalasynda 10 myńǵa jýyq oqýshy 222 týyndyny tamashalady», - deıdi ol.