Oqýshylarda sýdy únemdeý mádenıetin qalyptastyratyn baǵdarlama ázirlenedi

ASTANA. QazAqparat – Elimizde mektep oqýshylarynyń boıynda sýdy únemdeý mádenıetin qalyptastyrýǵa baǵyttalǵan arnaýly oqý baǵdarlamasy qabyldanady. Bul týraly Parlament palatalarynyń birlesken otyrysynan keıin Oqý-aǵartý mınıstri Ǵanı Beısembaev aıtty, dep habarlaıdy QazAqparat tilshisi.

«Sýdy únemdeý sabaqtarda, qosymsha jáne mektepten tys is-sharalarda qarastyrylǵan. Degenmen, osy jolǵy Joldaýdy eskere otyryp, bul baǵytta mektepterdegi tárbıe jumystaryn kúsheıtý qajet sııaqty. Oqýshylarymyzdyń arasynda sýdy únemdeý mádenıetin qalyptastyrýdy kúsheıtetin jeke baǵdarlama qabyldanady», - dedi mınıstr BAQ ókilderiniń saýalyna oraı.

Sonymen qatar Ǵanı Beısembaev oqýshylardy qarjy saýattylyǵyna tárbıeleý máselesine de toqtaldy.

«Qarjy saýattylyǵy – bul taqyryp 2019 jyldan mektepterge engizildi. Degenmen, ózge de tájirıbelerdi eskere otyryp, mektepterde bul baǵyttaǵy jumystardy jańasha kúsheıtkimiz keledi», - dedi vedomstvo basshysy.

Aıta keteıik, búgin Memleket basshysy Qasym-Jomart Toqaev «Ádiletti Qazaqstannyń ekonomıkalyq baǵdary» atty Qazaqstan halqyna Joldaýyn jarııa etti. Onda Prezıdent elimizde sýdy únemdi paıdalaný mádenıeti joq ekendigin aıtqan edi.