Oqýshylar úshin alańdaǵan kitaphanashyny Qostanaı oblysynyń bas polıtseıi qabyldady
Azamattarmen kezdesý «Nur Otan» partııasynyń aýdandyq fılıalynda ótti. Beket Aımaǵambetov Sılantev jáne Kishkentaı Chýrakov aýyldary turǵyndarynyń muń-muqtajyn tyńdady.
Obaǵan ormanshylyǵynyń ormanshysy Petr Ýrbanovıch osy aımaqtyń tabıǵı resýrstarynyń saqtalýyna alańdaýly. Onyń aıtýynsha, demalýshylardyń nemquraılyǵynan tabıǵat zardap shegip jatyr.
«Altynsarın aýdany óziniń qaraǵaıly ormandarymen tanymal. Kún saıyn munda demalý úshin kóp adam keledi. Olar ot jaǵady, káýap pisiredi, saldarynan ormanda órt shyǵý qaýpi týyndaıdy. Bizdiń aýdanda tabıǵatty qorǵaý polıtsııasynyń ınspektory joq, alaıda irgedegi Qostanaı aýdanynda bar. Sizden osy laýazymdy Altynsarın polıtsııa bóliminiń shtatyna engizý múmkindigin qarastyrýyńyzdy suraımyn», - dedi Petr Ýrbanovıch.
Departament bastyǵy Beket Aımaǵambetov bul usynysty qoldap, kórshi Qostanaı aýdanyndaǵy tabıǵatty qorǵaý polıtsııa ınspektoryna atalmysh aýmaqta qyzmet atqarýǵa quzyret berý múmkindigin qarastyrýdy tapsyrdy.
«Biz osy bólimsheni jasaqtap, onyń kadrlyq quramdastaryn kúsheıtetinimizdi atap ótkim keledi. Qazirgi ýaqytta oblystyń árbir aýdanynda osy shtat birligi engiziletin bolady. Oblystyń tabıǵı ártúrliligin saqtaý mańyzdy. Búginde qyzmetkerler úshin qarda júretin eki tehnıka jáne bes qyzmettik avtokólik satyp alyndy. Osy sharalardyń arqasynda bólimshe jumysynyń tıimdiligi artty», - dep jaýap berdi polıtsııa generaly.
Osy jyly 450-den astam brakoner ákimshilik jaýapkershilikke tartyldy jáne 2 brakonerge qatysty QR QK 339-baby boıynsha qylmystyq is tergelýde.
Qabyldaýǵa kelgen «Zýevka» JShS dırektory Aleksandr Borodın astyq jınaý naýqany kezinde patrýldik polıtsııa rotasynyń ınspektorlary agrarlarǵa astyqty kedergisiz jetkizýge kómektesýin ótindi.
«Sizdiń ótinishińizdi qoldaımyz, - dep jaýap berdi departament bastyǵy. - Qazirgi ýaqytta aýdanda jol qaýipsizdigin bir ekıpaj baqylaıdy. Ol qoıylǵan mindetterdi oryndaıdy dep úmittenemin».
Sonymen qatar, A. Borodın polıtsııa bólimine qyzmettik avtokólikti jańartý máselesin kóterdi.
«Bıylǵy jyly bizde avtokólik satyp alý josparlanǵan. Polıtsııa bólimine jańa avtokólik beriletin bolady», - dedi B. Aımaǵambetov.
Taǵy da úsh ótinish mal urlyǵyn ashýǵa qatysty boldy. Belgisiz bireýler aýyldyqtardyń aýlasynan maldaryn urlap ketken. Jábirlenýshiniń biri Maıra Kýldınovanyń aıtýynsha, Qostanaı aýdanynyń aýmaǵynda kúdikti ustalǵan. Alaıda, is sotqa jetken joq, sondyqtan da zalaldy materıaldyq óteý máseleleri sheshiler emes.
«Bul qylmystyq istiń tergelýi týraly jaqsy habardarmyn. Úsh adamnan turatyn qylmystyq topty bir aı buryn quryqtadyq. Olardan arqan jipter, pyshaqtar tárkilendi. Sondaı-aq olar birneshe aýdan aýmaǵynda, sonyń ishinde munda da urlyqtar jasaǵandary týraly moıyndady. Máseleńiz sheshiledi. Qazirgi tańda osy derek boıynsha tergeý amaldary júrgizilýde», - dedi oblystyq PD bastyǵy.
B.Aımaǵambetov atap ótkendeı, tergeý barysynda qurylǵan jedel-tergeý toby aýdan aýmaǵynda 14 mal urlyǵyn tirkedi. Búginde onyń altaýy ashyldy.
Al mektep kitaphanashysy Svetlana Kalınıchenko Sılantev aýyly boıynsha qozǵalys kezinde mektep oqýshylarynyń qaýipsizdigine alańdaýly.
«Sılantev aýylyndaǵy Beıbitshilik jáne Lenın kóshelerinde jaıaý júrginshiler jolaǵyn kórsetetin belgiler joq. Sonymen qatar, Sılantev, Obaǵan, Kishkentaı Chýrakov aýyldaryndaǵy kóshelerge beınebaqylaý ornatýyńyzdy suraımyz», - dedi ol.
Bul máseleni sheshýge oblystyń ákimshilik polıtsııasy qosylady. Jalpy, PD bastyǵy 10-nan astam azamatty qabyldady. Kezdesý barysynda Polıtsııa departamentiniń bastyǵy qylmysty ashýǵa kómekteskeni úshin Sverdlov kentiniń qoǵamdyq polıtsııa kómekshisi Vıktor Radıonovty marapattady.