Oqýshylar latyn qarpine aýdaratyn mobıldi konvertor jasady

PETROPAVL. QazAqparat - Nazarbaev Zııatkerlik mektebiniń oqýshylary Bulbul Qalman men Mádına Serik qazaq tilinde jazylǵan mátindi kırıllıtsadan latyn qarpine aýdaratyn Latin Translator Dictionary mobıldi konvertoryn jasady, dep habarlaıdy «QazAqparat» HAA tilshisi.

Oqýshy qyzdardyń aıtýynsha, qosymshany daıyndaýǵa úsh apta ýaqyt ketken. Ustazdarynyń jetekshiligimen jumys istegen olar, beıne sabaqtardan da kóp maǵlumattar alypty.

«Qosymshany  Java  kómegimen Android Studio negizinde jasadyq. Bul Android operatsııalyq júıesimen jumys isteıtin smartfondarǵa arnalǵan qosymsha . Zertteýler kórsetkendeı, elimizdegi turǵyndardyń 70 paıyzy osy júıeni qoldanady», - deıdi Bulbul Qalman.

Jobanyń ǵylymı jetekshisi Dana Abdýlmanovanyń aıtýynsha,  qosymshadaǵy ınterfeıs ıdeıalary tolyǵymen qyzdardyń óz qııalynan týǵan. 

«Qoldanýshylarǵa paıdasy tıip, halyq óz baǵasyn bere jatar. Endigi jospar  jobamyzdy  Play Market  qosymshasyna engizý. Jazǵa qaraı apgreıd nusqasyn daıyndaımyz. Jobany ary qaraı damyta túsemiz», - dedi Dana Abdýlmanova.