Oqýshylar biryńǵaı mektep formasyn saqtaýy tıis - BQO bilim basqarmasy
Onyń aıtýynsha, osy oraıda bıylǵy jańa oqý jyly qarsańynda oblystyń barlyq bilim berý uıymdarynda ata-analar jınalysy ótkizilip, biryńǵaı mektep formasyna saqtaýǵa qatysty túsinik jumystary júrgizildi. Alaıda bul talaptyń saqtalmaýy oryn alyp otyr. Mysaly, Oral qalasyndaǵy №37 orta mektepte dinı nanym boıynsha oramaldaryn tastamaǵan 13 oqýshy 2 qazannan bastap sabaqqa kirgizilmeýde. Osyǵan baılanysty olardyń ata-analarymen túsinik jumystary júrgizilýde. Atalmysh oqıǵany estigennen keıin qaladaǵy №30 orta mekteptiń oqýshy qyzy oramaldy óz erkimen sheshti. Degenmen oramal taǵyp kelý qalanyń 20 bilim ordasynda, Aqjaıyq, Zelenov (bul eki aýdanda jıyrmaǵa jýyq oqýshy), sondaı-aq Bórli, Shyńǵyrlaý, Terekti aýdandary mektepterinde ishinara kezdesedi. Bularmen de tıisti jumystar júrgizilýde.
Oblystyq din isteri basqarmasynyń basshysy Saıalbek Ǵızzatovtyń aıtýynsha, bizdiń elimiz QR Konstıtýtsııasyna sáıkes zaıyrly memleket bolǵandyqtan, bilim berý júıesinde eki baǵyt qalyptasqan. Biri - zaıyrly bilim berý, bul bilim berý júıesine mektepter, ýnıversıtetter jatsa, ekinshi - dinı bilim alý júıesi, buǵan elimizdegi medreselerdi, teologııalyq baǵyttaǵy bilim beretin joǵary oqý oryndaryn jatqyzýǵa bolady. «Dinı qyzmet jáne dinı birlestikter» týraly Zańnyń 3-baby 7-tarmaǵynda «eshkim óziniń dinı senim-nanymdary boıynsha Konstıtýtsııada jáne ózge de zańdarda belgilengen mindetterdi oryndaýdan bas tartýǵa quqy joq» dep kórsetilgen. QR kez kelgen azamaty orta bilim alýǵa mindetti. Soǵan baılanysty qoǵamnyń kez kelgen múshesi zańnamada belgilengen talaptardy oryndaýy tıis.
Brıfıngte BQO bilim salasyndaǵy baqylaý departamentiniń basshysy Svetlana Bahısheva bilim salasyndaǵy normatıvtik qujattar týraly tolyq aqparat berdi.
- QR Bilim jáne ǵylym mınıstriniń 2016 jyldyń 4 qańtarynda bekitken mektep formasyna qoıylatyn biryńǵaı talaptar erejesiniń ІІ taraýynyń 5-tarmaǵynda mekteptegi uldar men qyzdar formasy, merekelik, sporttyq sharalarda kıiletin kıim úlgisi naqty kórsetilgen. Qazirgi qoǵamda kóterilip otyrǵan kúrdeli máseleniń biri - mektepke oramal taǵyp kelý. Mektepke oramal taǵý atalǵan erejeniń talabynda kórsetilmegen. Osy jerde bul erejeni barlyq ata-analar bile me degen saýal týyndaıdy. Atalǵan buıryqtyń bir tarmaǵy bar. Onda kórsetilgen kıim úlgilerine ata-analar keńesi ózderiniń kıim úlgisin engizýge quqyǵy bar. Ár mektep buıryqqa sáıkes ata-analar keńesi nemese qamqorlyq keńesinde mektep jarǵysyn ózgerte otyryp, osy úlgini qabyldaı alady. Qabyldanǵannan keıin mekteptiń ata-analary ár synyp boıynsha habarlap, aqparattandyrýy tıis. Mektep formasyna qatysty máseleler týyndaǵan jaǵdaıda mekteptiń ata-analar keńesi talqylaıdy.
Sondaı-aq «Bilim týraly» Zańnyń 49-babynda ata-analar men zańdy ókilderdiń quqyqtary men mindetteri kórsetilgen. Onda «Ata-analar bilim berý uıymynyń jarǵysynda aıqyndalǵan qaǵıdalardy oryndaýǵa mindetti» delingen. Sondyqtan ata-analar jáne ózge de zańdy ókilder bilim berý uıymdarynyń talaptaryn oryndamaǵan jaǵdaıda QR Ákimshilik quqyqbuzýshylyq kodeksiniń 409-babynyń 209-tarmaǵy boıynsha 10 aılyq eseptik kórsetkish negizinde aıyppul tóleıdi. Sonymen qatar, atalǵan Kodekstiń 127-baby boıynsha ata-analarǵa ózderiniń mindetterin tolyq oryndamaǵan jaǵdaıda ákimshilik sharalar alynatyn bolady, - dedi Svetlana Meńdiǵalıqyzy.