Oqýshylar arasyndaǵy «Tulpar minip, tý alǵan» baıqaýyna 50 myń oqýshy qatysady
«Bul aýqymdy ári aǵartýshy joba. Ol jobaǵa biz elimizdiń barlyq óńirlerinen 50 myńnan astam oqýshyny tartýdy josparlap otyrmyz. Onyń maǵynasy - oqýshylar qazaqtyń «Qobylandy batyr» eposyn jattap qana qoımaı, ony talqylap, qazaqtyń ertedegi sózderine túsinik bere alýy kerek. Bul baıqaýdy Jastar jylyna arnap otyrmyz. Qoǵamnyń keń nazaryna ıe bolar degen senimimiz bar. Jobanyń fınaldyq kezeńi - «Habar» telearnasynda telekúndelik jáne gala-kontsert formatynda ótedi. Bul rette men osy jobany qoldaýǵa daıyn otyrǵan oblys ákimdikterine, Almaty men Astana, Shymkent qalasynyń ákimdigine, Bilim jáne ǵylym mınıstrligine erekshe alǵysymdy bildirgim keledi», - deıdi Dáýren Abaev.
Mınıstrdiń aıtýynsha, álemde mundaı oqýlar kóptegen elderde ótip jatady.
«Máselen, aǵylshyn tildi elderde «Shekspır» oqýlary ótip jatady. Ol az deseńiz, Reseıde «Pýshkın» oqýlary ótkiziledi. Barlyq jerde maqsat bireý - ósip kele jatqan jas býynǵa týǵan tilimizdiń baılyǵy men kórkemdigin, bizdiń babalardyń poetıkalyq murasynyń kórkemdigin kórsetý», - dedi mınıstr.
Eske sala ketsek, buǵan deıin Qazaqstanda mektep oqýshylary arasyndaǵy «Tulpar minip, tý alǵan!» baıqaýy ótetini habarlanǵan edi. Negizgi maqsat - jastardy «Alpamys», «Er Tarǵyn», «Qobylandy batyr» jyrlary syndy xalqymyzdyń baı murasy negizinde tárbıeleý.
Baıqaý 6-10-synyp oqýshylary arasynda uıymdastyrylady. Osy joly «Qobylandy batyr» jyrynyń Marabaı jyraý nusqasyn jatqa aıtý qajet. Baıqaýǵa respýblıka boıynsha 5 000 mektepten 50 000 oqýshy qatysady degen jospar bar. Ár mektepten 10 oqýshy (6-shy synyptan 2 oqýshy, 7-shi synyptan 2 oqýshy, 8-shi synyptan 2 oqýshy, 9-shy synyptan 2 oqýshy jáne 10-shy synyptan 2 oqýshy) qatysa alady.
Joba úsh kezeńnen - aýdandyq, oblystyq jáne respýblıkalyq irikteýden turady. Aýdandyq kezeńde 1-shi oryn úshin 150 000 teńge, 2-shi oryn - 100 000 teńge, 3-shi orynǵa 50 000 teńge qarastyrylǵan. Al oblystyq kezeńde 1-shi oryn úshin 1 000 000 teńge, 2-shi oryn - 600 000 teńge, 3-shi oryn alǵandarǵa 300 000 teńge tabystalady. Qazirgi kezde respýblıkalyq irikteýdiń qarjylaı qory pysyqtalyp jatyr.