Oqýshylar arasynda Ulttyq týrnır ótip jatyr

NUR-SULTAN. QazAqparat – Senbi kúni elordadaǵy Oqýshylar saraıynda Tuńǵysh Prezıdent kúni men QR Táýelsizdiginiń 30 jyldyǵyna arnalǵan Ulttyq mektep pikirsaıys týrnıri ótip jatyr, dep habarlaıdy QazAqparat.

Týrnır Nursultan Nazarbaev qory «Elbasy Akademııasy» korporatıvtik qorynyń bastamasymen jáne qoldaýymen ótýde. Uıymdastyrýshy – QR Bilim jáne ǵylym mınıstrliginiń Respýblıkalyq qosymsha bilim berý oqý-ádistemelik ortalyǵy (RQBBOÁO).

«Pikirsaıys bilim berý tehnologııasy retinde jastardyń, ásirese mektep jasynda áleýetin arttyrýǵa, sondaı-aq jańa býyn kóshbasshylaryn ósirýge yqpal etedi. Sońǵy 15 jylda elimizde ulttyq deńgeıde offlaın formatta oqýshylar arasynda pikirsaıys týrnıri ótkizilgen joq», - dedi RQBBOÁO-da.

Málim etilgendeı, týrnırge 34 komanda qatysady. Olar óz óńirlerinde ótken irikteý oıyndarynda jeńiske jetip, 40 myńnan astam oqýshy arasynda úzdik atanǵan. Óńirlerdiń namysyn tek oblys ortalyqtarynan ǵana emes, shaǵyn qalalardan, eldi mekenderden jáne tipti aýyldardan shyqqan komandalar qorǵaıdy.

Jas spıkerler amerıkalyq parlamenttik format erejeleri boıynsha úkimet pen oppozıtsııa komandalary bolyp, týrnırdiń jalpy taqyryby – el men qoǵamnyń qalyptasýynyń 30 jyldyq jolyna strategııalyq jáne jan-jaqty kózqarasty talqylaıdy.

Ashylý saltanatyna Nursultan Nazarbaev Qory atqarýshy dırektorynyń orynbasary Álkeı Marǵulanuly, «Elbasy Akademııasy» KQ basqarýshy dırektory Murat Jumanbaı, QR BǴM RQBBOÁO dırektory Raısa Sher, «R4 Technology & Research Center» bilim berý-zertteý ortalyǵynyń dırektory Aıdyn Týsıýbjanov jáne basqalary qatysty.