Oqýshy ólimi: Aqtóbede taǵy bir oqýshy kúdikke iligip, qamaldy

<p>AQTÓBE. KAZINFORM &ndash; Temir aýdany Qopa aýylyndaǵy 9 synyp oqýshysynyń óliminen soń aldymen eki jasóspirim qamaldy. Qazirgi kezde taǵy bir kámeletke tolmaǵan bala kúdikke ilikti.&nbsp;</p>

Aqtóbe oblystyq Polıtsııa departamenti taǵy bir adamnyń kúdikke ilikkenin habarlady.

– Temir aýdanynyń Qopa aýylynda kámeletke tolmaǵandar arasynda qaqtyǵys bolyp, 9 synyp oqýshysy qaıtys boldy. Osy fakti boıynsha buzaqylyq jáne densaýlyqqa qasaqana aýyr zııan keltirý deregimen sotqa deıingi tergep-tekserý bastaldy. Kezekshi táýlikte osy oqıǵanyń barlyq qatysýshycy anyqtaldy. Olardyń áreketterine quqyqtyq baǵa beriletin bolady. Jedel-tergeý toby qurylyp, qylmystyq is Aqtóbe oblystyq Polıtsııa departamentiniń óndirisine qabyldandy. Protsessýaldyq prokýror taǵaıyndaldy. Qazirgi ýaqytta obektıvti jáne jan-jaqty tergeý sharalary atqarylýda. Kámeletke tolmaǵan úsh kúdikti ýaqytsha ustaý ızolıatoryna qamaldy. Áleýmettik mártebesine, týystyq baılanystaryna qaramastan, barlyq kináli adam jaýapqa tartylady. Qylmystyq is boıynsha ózge de málimetter jarııa etýge jatpaıdy. Tergeý barysy polıtsııa departamenti bastyǵynyń baqylaýynda, - dedi Aqtóbe oblystyq PD bastyǵynyń orynbasary Ǵalym Baıjanov. 

Buǵan deıin habarlaǵanymyzdaı, 2 qyrkúıek kúni oqýshylar tóbelesip, bir jasóspirim kóz jumdy. 

Osy oqıǵadan soń arnaıy jumys toby quryldy. Sol kúni mektep dırektory jumystan shyǵaryldy. 

– Mektep dırektory oqıǵa bolǵanǵa deıin otbasy jaǵdaıyna baılanysty jumystan bosatý jóninde aryz jazǵan. Sol sebepten óz erkimen jumystan shyqty, - dedi Aqtóbe oblystyq Bilim basqarmasynyń basshysy Jaıyq Sultan.