Oqýlyqtarda 1921-1922 jyldardaǵy ashtyqqa baılanysty materıal joqtyń qasy – ǵalym

NUR-SULTAN. QazAqparat – Elimizdegi jalpy oqýlyqtarda 1921-1922 jyldardaǵy ashtyqqa baılanysty materıal joqtyń qasy. Mundaı pikirdi Sh.Ýálıhanov atyndaǵy Tarıh jáne etnologııa ınstıtýtynyń dırektory, tarıh ǵylymdarynyń doktory, professor Zııabek Qabyldınov bildirdi, dep habarlaıdy QazAqparat tilshisi.

«Bıyl 1921-1922 jyldardaǵy jappaı asharshylyq bastalǵanyna 100 jyl tolady. 1921-1922 jyldardaǵy asharshylyq jáne onyń saldary birqatar muraǵat qorlarynyń jabyqtyǵyna baılanysty ǵylymı turǵyda zerttelmegen. Soǵan oraı mektep jáne ýnıversıtet oqýlyqtarynda 1921-1922 jyldardaǵy ashtyqqa baılanysty materıaldar joqtyń qasy», - dedi ǵalym.

Osyǵan baılanysty Zııabek Qabyldınov asharshylyqtyń eki kezeńine qatysty arhıv qoryndaǵy materıaldardy tolyǵymen ashý kerektigin aıtady. Onyń atap ótýinshe, keshendi zertteýlerdiń qorytyndylary mektep jáne joǵary oqý oryndarynyń oqýlyqtarynda berilýimen qatar, ózge tilderge de aýdarylyvp, shetel aýdıtorııasyna da usynylýy kerek. Jalpy, ǵylymı zertteý jumystary Qazaqstannyń barlyq óńirinde júrgizilýi kerek.

Esterińizge sala ketsek, keshe «Azattyq jolyndaǵy aqtańdaqtar: asharshylyq zardaptaryna shynaıy tarıhı kózqaras» taqyrybyna arnalǵan dóńgelek ústel ótti. Onda QR Parlamenti Senatynyń tóraǵasy Máýlen Áshimbaev asharshylyq taqyrybyna qatysty júıeli, tarıhı faktilerge súıengen tereń ári jan-jaqty zertteýler kerek ekenin basa aıtty. Ol úshin tıisti arhıv derekterine qol jetkizý, olardy júıeleý jáne muqııat zerdeleý, óńirlermen jáne ondaǵy asharshylyq taqyrybyn zerttep júrgen ǵalymdarmen tyǵyz baılanys ornatý, kórshiles elderdiń arhıv materıaldarymen jiti tanysý, asharshylyq kýágerleriniń túrli estelikterin jınaqtaý qajet degen oıyn jetkizdi.