Oqý jylyna daıyndyq: Qaraǵandy oblysynda muǵalimderdiń 84 paıyzy ekpe aldy

QARAǴANDY. QazAqparat – Qaraǵandy oblysynda jańa oqý jylyna daıyndyq, muǵalimderdi vaktsınatsııalaý barysy – bul týraly apparattyq keńeste aıtyldyǵ dep habarlaıdy QazAqparat tilshisi.

«El Prezıdenti 10 shildedegi Úkimettiń keńeıtilgen otyrysynda sóılegen sózinde oqýshylar men stýdentterdiń dástúrli oqytý júıesine oralýyn qamtamasyz etý máselelerine erekshe nazar aýdardy. Pandemııa kezinde olar qashyqtan bilim alýǵa májbúr boldy. Biz ótken oqý jylynda jiberilgen olqylyqtardyń ornyn toltyryp, olardy bolashaqta qaıtalamaýǵa tıispiz», - dep atap ótti oblys ákimi Jeńis Qasymbek.

Bilim basqarmasynyń basshysy Gúlsim Qojahmetova shtattyq formatta jumys isteý úshin basty talap – KVI-ge qarsy pedagogtar men qyzmetkerlerdi 100 paıyz vaktsınalaý ekenin habarlady.

Onyń aıtýynsha, búginde oqý oryndarynyń qyzmetkerleriniń 84% ekpe aldy. Vaktsınatsııany 18 jastan asqan kolledj stýdentteri de jasaıdy.

Barlyq bilim uıymdary sanıtarlyq quraldarmen qamtamasyz etilgen.

«Kabınettik júıeni joıý jáne ártúrli synyptar úshin úzilisti bólý arqyly, 25 oqýshydan aspaıtyn synyptarǵa birneshe aýysymda sabaq ótkizý josparlanyp otyr. Sabaq kestesi bastaýysh, orta jáne joǵary býyndy eskere otyryp jasalady. Bul jaǵdaıda eger oqýshylardyń bireýinde koronavırýs anyqtalsa, barlyq mekeme emes, jeke blok karantınge jabylady», – dedi Gúlsim Qojahmetova.

Qajetti oqýlyq satyp alynady. Buǵan bıýdjetten qarajat bólindi.

Jańa oqý jylyna deıin oblysta 146 bilim nysanyn jóndeý josparlanǵan: 111 mektep, 26 balabaqsha, 8 kolledj, bir balalar úıi.

Toǵyz nysannyń, onyń ishinde tórt mektep pen eki balabaqshanyń qurylysy júrgizilýde.

Oblys ákimi qaýipsizdikti barynsha saqtaı otyryp, dástúrli oqý formatyna oralý úshin barlyq qajetti sharalardy qabyldaýdy tapsyrdy.

Qaraǵandy oblysynda 1 qyrkúıekten bastap 209 067 oqýshy, onyń ishinde birinshi synyp oqýshylary – 21 803-i oqýǵa kirisedi.