Oqý jylyn qysqartý máselesi qaralyp jatqan joq - mınıstrlik

ASTANA. QazAqparat – Mektep oqýshylary úshin oqý jylyn qysqartý máselesi qaralyp jatqan joq. Bul týraly Oqý-aǵartý birinshi vıtse-mınıstri Sholpan Karınova málim etti, dep habarlaıdy QazAqparat tilshisi.

«Oqý jylyn qysqartý máselesi qaralyp jatqan joq. Jyl basynda ata-analar men balalarǵa oqý jyly 36 aptaǵa sozylatynyn habarladyq. Oqý josparlary men baǵdarlamalary, kúntizbelik-taqyryptyq josparlar memlekettik bilim berý standarty men bilim berý baǵdarlamalarynyń talaptaryn oryndaý úshin jasalǵan. Sondyqtan, bul máseleni qaıta kóterýdiń qajeti joq. Byltyr oqý jyly 1 qyrkúıekte bastaldy, bıyl 31 mamyrda aıaqtalady, ıaǵnı 31 mamyr – sońǵy oqý kúni», - dedi Sholpan Karınova OKQ-de ótken brıfıngide.

Osylaısha, mektep oqýshylary 1 maýsymnan bastap jazǵy kanıkýlǵa shyǵady.

«Balalar jazǵy demalysta úsh aı, ıaǵnı 90 kún demalady. Bıyl kanıkýldyń birinshi kúni halyqaralyq balalardy qorǵaý kúnine sáıkes keledi. Bul bizdiń balalarymyzdyń merekelik kóńil-kúıin kótere túsedi», - deıdi mınıstrdiń birinshi orynbasary.

Buǵan deıin habarlaǵanymyzdaı, endigi ýaqytta kolledj túlekterine dıplomnan bólek quzyrettilik kartasy berilmek.