Oqý jyly bıyl da 25 mamyrda aıaqtalady – Bilim mınıstrligi

NUR-SULTAN. QazAqparat – Qazaqstannyń bilim berý uıymdary oqytýdyń kabınettik júıesine kóshiriledi. Bul týraly QR Bilim jáne ǵylym mınıstrligi Mektepke deıingi jáne orta bilim komıtetiniń tóraǵasy Gúlmıra Kárimova aıtty, dep habarlaıdy QazAqparat tilshisi.

«Úkimettiń júıeli jumysynyń nátıjesinde oqýshylar oflaın formattaǵy oqýǵa kóshti. ІV toqsan barlyq bilim berý uıymdarynda dástúrli (shtattyq) formatta bastalady», - dedi G. Kárimova Ortalyq komýmnıkatsııalar qyzmetinde.

7,5 myń orta bilim berý uıymdarynda oqýshylar kontıngenti shamamen 3,6 mln balany quraıdy (2,4 mln. oqýshy qazaq tilinde bilim alady, 65,3 %), bul ótken oqý jylynyń osy kezeńimen salystyrǵanda 200 myń balaǵa artyq.

Mektep basshylary bilim berý uıymdarynda qoıylatyn sanıtarııalyq-epıdemıologııalyq talaptardyń qatań saqtalýyn qamtamasyz etedi.

«Bıylǵy 24 naýryzda Qazaqstan Respýblıkasynyń aýmaǵynda koronavırýs ınfektsııasy taralýynyń aldyn alý jónindegi vedomstvoaralyq komıssııanyń otyrysy ótti. Eldegi epıdemıologııalyq jaǵdaıdyń turaqtanýyn eskere otyryp, Vedomstvoaralyq komıssııa bilim berý uıymdarynda oqytýdyń kabınettik júıesine kóshýge ruqsat berý týraly sheshim qabyldady», - dedi komıtet basshysy.

Jalpy, barlyq orta bilim berý uıymdarynda 4-toqsan uıymdasqan túrde bastalady. Oqý toqsanynyń uzaqtyǵy – 8 apta.

Oqý jyly dástúrli túrde bıylǵy jyldyń 25 mamyrynda aıaqtalady.