Oqý jyly bastalǵannan beri 22 myń oqýshydan koronavırýs anyqtaldy

NUR-SULTAN. QazAqparat – Jańa oqý jylynyń bastalǵannan beri 22 myńnan astam oqýshydan koronavırýs anyqtaldy. Bul týraly QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Jańa oqý jylynyń bastalýyna baılanysty mınıstrlik oqýshylar arasyndaǵy syrqattanýshylyqqa kúndelikti monıtorıng júrgizýde. KVI-diń 22 021 jaǵdaıy tirkeldi. Bul oqýshylardyń jalpy sanynyń 0,6 paıyzyn quraıdy. 160 myńnan astam baılanysta bolǵan adam anyqtaldy. Onyń ishinde 1 409 oń nátıje anyqtaldy», - dedi mınıstr Ortalyq kommýnıkatsııalar qyzmetindegi baspasóz máslıhatynda.

Onyń dereginshe, qazan aıynda qyrkúıek aıymen salystyrǵanda oqýshylar arasynda syrqattanýshylyqtyń 1,2 esege tómendegeni baıqalady. Birinshi toqsanda 15 aýysym jáne 12 304 synyp karantınge jiberilgen.

«Stýdentter arasynda 2 674 jaǵdaı tirkeldi. Onyń ishinde 1 948 orta oqý oryndarynyń stýdentteri arasynda jáne 726 jaǵdaı joǵary oqý oryndarynyń stýdentteri arasynda. Bul orta oqý oryndaryndaǵy bilim alýshylardyń 0,5 paıyzyn jáne joǵary oqý oryndaryndaǵy bilim alýshylardyń 0,1 paıyzyn quraıdy», - dedi Alekseı Tsoı.