Oqý jyly bastalǵaly Kókshetaýda 269 bala koronavırýs juqtyrdy

KÓKShETAÝ. QazAqparat - Bıylǵy oqý jylynyń basynan Kókshetaý qalasyndaǵy 29 mektep koronavırýs 269 oqýshyda zerthanalyq túrde rastaldy. Bul týraly qalanyń Bas memlekettik sanıtarlyq dárigeri Qanat Ysqaqov aıtty, dep habarlaıdy QazAqparat tilshisi.

Onyń aıtýynsha, álemde COVID-19 aýrýy boıynsha epıdemıologııalyq jaǵdaı órshı túsýde. Koronavırýs ınfektsııasy boıynsha respýblıka óńirlerindegi epıdemıologııalyq jaǵdaıdy baǵalaý matrıtsasyna sáıkes, Aqmola oblysy áli de «qyzyl» aımaqta tur (5 qarashadaǵy jaǵdaı).

«Pandemııa bastalǵannan beri Kókshetaý qalasynda COVID-19 zerthanalyq rastalǵan 13 641 jaǵdaıy tirkeldi. 5 qarashada 94 jaǵdaı tirkelgen, onyń ishinde 11-i – oqýshylar arasynda. Sońǵy táýlikte juqtyrǵandar sany 14 adamdy qurady, aýrýshańdyq azaıyp keledi», - dep atap ótti Q.Ysqaqov.

Alaıda, ólim-jitimniń joǵary deńgeıi saqtalýda. Máselen, ótken táýlikte Kókshetaýda indetten 2 adam kóz jumdy.

Kókshetaýdyń bas memlekettik sanıtarlyq dárigeri atap ótkendeı, búgingi tańda 217 adam aýrýhanaǵa jatqyzyldy, 27 naýqas – reanımatsııada, olardyń barlyǵy ottegine táýeldi. Naýqastardyń 99 paıyzy vaktsınalanbaǵan. Qyrkúıek aıynyń basynan beri 29 orta bilim berý mekemesinde oqýshylar arasynda koronavırýstyń zerthanalyq rastalǵan 269 jaǵdaıy anyqtaldy.

«Olardyń 244-i shtattyq rejımde oqydy. Besinshi qarashadaǵy jaǵdaı boıynsha 13 bilim berý mekemesinde 15 bala karantınde jatyr. Barlyǵy ambýlatorııalyq negizde úıde em qabyldaýda», - dedi Q.Ysqaqov.