Oqý jyly bastalǵaly qansha balaǵa koronavırýs juqqany belgili boldy

NUR-SULTAN. QazAqparat – QR DSM Medıtsınalyq jáne farmatsevtıkalyq baqylaý komıteti Dárilik zattar men medıtsınalyq buıymdardy saraptaý ulttyq ortalyǵy sarapshysy Nurshaı Ázimbaeva balalar arasynda KVI-diń taralýy týraly suraqqa jaýap berdi, dep habarlaıdy QazAqparat tilshisi.

«Resmı monıtorıng derekterine sáıkes, qazirgi kezde oqýshylar arasynda tirkelgen koronavırýs jaǵdaıynyń sany 2583-ke jetti. Ol oflaın túrde oqıtyn balalar arasynda. Sondaı-aq onlaın (qashyqtan) oqıtyndar arasynda 6089 koronavırýs ınfektsııasynyń jaǵdaıy tirkeldi. Bul málimet 2020 jyldyń 1 qyrkúıeginen bastap qazirgi ýaqytqa deıin tirkelgen derekter», - dep naqtylady N. Ázimbaeva Ortalyq kommýnıkatsııalar qyzmetinde.

Budan buryn habarlanǵandaı, baspasóz máslıhatynda QR Densaýlyq saqtaý vıtse-mınıstri, bas memlekettik sanıtarlyq dáriger Erlan Qııasov koronavırýsqa qarsy vaktsınalaý naýqanyna qatysty túsinik berdi.

Koronavırýs ınfektsııasyna qarsy vaktsınatsııalaý jalǵasyp jatyr. Qazirgi kezde birinshi komponentpen 20 157 adam egildi. 22 aqpannan bastap ekinshi komponentpen vaktsınalaý bastalyp, 2 137 adamǵa ekpe jasaldy, qolaısyz kórinister tirkelgen joq.

Sonymen qatar Qazaqstanda 65 jastan asqan adamdardy vaktsınatsııalaýǵa ruqsat etildi.