Oqý úlgerimi tómen «Bolashaq» stıpendııasynyń ıegerleri memleketke 300 mln. teńgeden astam qarjy qaıtarady

ASTANA. 25 qarasha. QazAqparat - Oqý úlgerimi tómen «Bolashaq» stıpendııasynyń ıegerleri memleketke 300 mln. teńgeden astam qarjy qaıtarýy tıis. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde «Bolashaq» baǵdarlamasynyń 20 jyldyǵyna oraı ótken baspasóz máslıhatynda «Halyqaralyq baǵdarlamalar ortalyǵy» AQ Prezıdenti Ǵanı Nyǵymetov málim etti.

Onyń sózine qaraǵanda, stıpendıanttyń oqýǵa degen qaýqarsyzdyǵyn kórsetetin deńgeı qarastyrylǵan. Máselen, AQSh-ta jalpy baldan shekti deńgeı 4 baldy quraıdy. Eger ol 2 baldan tómendese, onda stıpendııany saqtaý maqsattylyǵy máselesi tótesinen qoıylady. «Bundaı jaǵdaılar bizde bar. Osy oraıda bul másele Bilim jáne ǵylym mınıstrligi jumys tobynyń qaraýyna shyǵarylady, sodan keıin olardy respýblıkalyq komıssııa qarastyrady. Onda jumsalǵan barlyq qarjyny óteý talabymen «Bolashaq» ıegeri stıpendııadan aıyrylady»,-dedi ol. Qazirgi kezde osyndaı 40 oqıǵa tirkelgen. Olardyń 90 paıyzy ortalyqpen bekitilgen kelisim aıasynda qarjyny óz erikterimen qaıtarýda. Olardyń bereshek jalpy qarjysy 323 mıllıon teńgeni qurap otyr.