Oqý ornyndaǵy álimjettik: Oralda mektep basshylyǵy tártiptik jaýapkershilikke tartyldy
Kazinform tilshisi budan buryn Oral qalasynyń turǵyny qyzyn synyptastary uryp-soqqany jóninde shaǵym túsirgenin jazǵan bolatyn.
Atalǵan máselege baılanysty BQO bilim basqarmasynan málim etkenindeı, 8 qarasha kúni № 20 orta mekteptiń tárbıe bólimine bir oqýshynyń telefonyn synyptastary tartyp alyp, bermeı jatqany jóninde shaǵym túsken.
Mektep dırektorynyń tárbıe isi jónindegi orynbasary Jansaıa Meńdiǵalıeva synypqa kirgen kezde oqýshylardyń telefondy qaıtarǵany týraly aıtylǵan. Qyzdyń jaǵdaıyn suraǵan ýaqytta ol «Bári jaqsy, telefonymdy qaıtardy», - dep jaýap bergen.
Sol boıda oqýshylarǵa bireýdiń zatyn ruqsatsyz alýǵa bolmaıtyny týraly túsindirme jumysy júrgizilgen. Qyzdyń ata-anasynan shaǵym túskennen keıin mektep ókilderi Shaǵan polıtsııa bólimine shaqyrtylǵan.
«Mán-jaıdy tolyq anyqtaý maqsatynda mektepte ata-analar jınalysy ótkizildi. Biraq anasy qyzyn mektepke ákelmedi. Barlyq synyp oqýshylary bolǵan oqıǵany baıandap, ata-anasynan keshirim surady. Jınalystyń sheshimi boıynsha 5 oqýshy mektepishilik esepke alyndy. Odan keıin ata-analar balalaryn alyp, oqýshynyń úıine barǵan kezde, qyz: «Eshkim meni urǵan joq, eshkimge renishim joq», - degen. Osy oqıǵaǵa baılanysty basqalaı da profılaktıkalyq is-sharalar atqaryldy. 4 jeltoqsan kúni dırektordyń mindetin atqarýshy J.Meńdiǵalıeva laýazymdyq mindetterin tıisti deńgeıde atqarmaýy saldarynan mekteptegi ishki baqylaýdy álsiretý arqyly kemshilikterge jol bergeni úshin eskertý túrindegi tártiptik jazaǵa tartyldy», - dep habarlady vedomstvodan.