Oqý granttarynyń úshten bir bóligine jýyǵy ÚIID júzege asyrý úshin kadrlar daıarlaýǵa baǵyttalady - QR BǴM

ASTANA. 11 maýsym. QazAqparat - Qazaqstanda memlekettik oqý granttarynyń jalpy sanynan úshten birine jýyǵy, bıyl 35 myńnan astam, olar údemeli ındýstrııalyq-ınnovatsııalyq damý baǵdarlamasynyń jobalaryn júzege asyrý úshin tehnıkalyq mamandyqtar boıynsha kadrlar daıarlaýǵa baǵyttalady,

dep habarlady Rrimeminister.kz saıtyna bergen eksklıýzıvti suhbatynda QR BǴM Joǵary jáne joǵarǵy oqý ornynan keıingi bilim berý departamentiniń bilim berý jáne kadrlar daıarlaý basqarmasynyń basshysy Gúlzat Kóbenova.

«Jyl saıyn memlekettik tapsyrysty qalyptastyrmas buryn suranys zerdelenedi. Bul suranys ortalyq memlekettik organdardyń, óńirlik qurylymdardyń, ulttyq kompanııalardyń tapsyrystary negizinde zertteledi, árıne memlekettik jáne salalyq baǵdarlamalardy júzege asyrý eskeriledi. Sáıkesinshe, memlekettik tapsyrystyń jalpy kóleminde úshten birin ÚIID jobalaryna sáıkes keletin mamandyqtar, tehnıkalyq mamandyqtar quraıdy», - dedi G.Kóbenova.

Budan ózge, pedagogıkalyq mamandyqtarǵa granttar sany arttyrylǵan, onyń sany shamamen 6 myńǵa jetti, aýyl sharýashylyq mamandyqtaryna shamamen 2 myń oryn bólingen.

Osylaısha, ústimizdegi jyly memlekettik tapsyrys kelesi mamandyqtar boıynsha arttyrylǵan: bilim berý - 130, óner - 15, tehnıkalyq ǵylymdar men tehnologııalar - 475, jaratylys ǵylymdary - 120, gýmanıtarlyq - 70, veterınarııa men áleýmettik ǵylymdar - 20-dan.

Óz kezeginde memlekettik tapsyrys kólemi zań mamandyqtary boıynsha azaıǵan.

Jalpy alǵanda, aǵymdaǵy jyly memlekettik tapsyrys kólemi 35 053 grantty qurady. Ótken jylmen salystyrǵanda grant sany 738 birlikke artqan, al ótken jyly memleket 34 315 grant ornyn bólgen bolatyn.