Oqý-aǵartý mınıstriniń balalary qandaı mektepte oqıdy

<p>Dúnıejúzilik bank sarapshylarynyń Qazaqstan oqýshylarynyń saýatyna qatysty deregi - jaýyr bolǵan aqparat. Bul týraly Oqý-aǵartý mınıstri Ǵanı Beısembaev aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

Búgin Úkimet otyrysynan keıin uıymdastyrylǵan brıfıngte BAQ ókilderi mınıstrden «Dúnıejúzilik bank sarapshylary Qazaqstandaǵy mektep oqýshylarynyń 64 paıyzy fýnktsıonaldyq turǵyda saýatsyz degen eken. Bul pikirmen kelisesiz be? Bilim sapasy mektepterde sonshalyqty nashar ma?» dep suraǵan edi.

Mınıstr mundaı tujyrymmen kelispeıtinin qadap aıtty.

«Jalpy, bul pikirmen múlde kelispeımin. Dúnıejúzilik banktiń aıtyp otyrǵany — eskirgen, jaýyr bolǵan aqparat. 2018 jyldan beri kele jatqan dúnıeler. Odan beri qanshama ýaqyt ótti, sapany kóterý baǵytynda qanshama jumys atqarylyp jatyr. Bul týraly biz únemi ashyq aıtyp otyramyz. Oqýshylarymyzdyń deńgeıi osyndaı degen sózdiń shyndyqqa janaspaıtynyn aıtqym keledi», — dedi Ǵanı Beısembaev.

Sonymen qatar ol balalarynyń úıge jaqyn memlekettik mektepte bilim alatynyn atap ótti.

«Qarapaıym mektep. Muǵalimderi de, oqý protsesi de kóńilimnen shyǵady. Qolym tıgende balalarymnyń sabaǵyn qarap otyramyn. Baǵasyn qadaǵalaý úshin ǵana emes, túsindirgen, oqyǵan sabaqtaryn jetkizýde jaqsy qalyptasqan biliminiń bar ekenin baıqadym», — dedi mınıstr.