Oqý-aǵartý mınıstri Syr óńiriniń mektepterin aralady

QYZYLORDA. QazAqparat - Búgin Qyzylorda oblysyna arnaıy jumys saparymen kelgen QR Oqý-aǵartý mınıstri Ǵanı Beısembaev oblys ákimi Nurlybek Nálibaevpen birge Jańaqorǵan, Shıeli aýdandarynda bilim berý nysandarynyń jumysymen tanysty, dep habarlaıdy QazAqparat.

Bilim salasyndaǵy sybaılas jemqorlyqqa qarsy kúres jóninde májilis ótkizdi.

Aldymen vedomstvo basshysy Jańaqorǵan aýdanyndaǵy «Taldysý» oblystyq olımpıadalar jáne qosymsha bilim berý ortalyǵynyń jumysymen tanysyp, osynda bilim alyp jatqan «Syr daryny» akademııasynyń oqýshylarymen kezdesti. 320 oryndyq ortalyqta 55 qyzmetker bar, nysan 2011 jyly paıdalanýǵa berilgen.

M.Kókenov atyndaǵy mádenıet úıinde bilim salasyndaǵy sybaılas jemqorlyqtyń aldyn alý boıynsha májilis ótti. Oǵan Qyzylorda qalasy men barlyq aýdandardyń ákimderi jáne bilim berý uıymdarynyń basshylary onlaın formatta qatysty. Májiliste bilim salasyndaǵy sybaılas jemqorlyqtyń aldyn alý jáne táýekelderin boldyrmaý týraly eki másele qaraldy.

Kún tártibindegi máseleler boıynsha oblystyq bilim basqarmasynyń basshysy Meırambek Shermaǵanbet, Sybaılas jemqorlyqqa qarsy is-qımyl agenttigi oblys boıynsha departamenti basshysynyń birinshi orynbasary Asylhan Ashıkov, Oqý-aǵartý mınıstrligi bilim salasyndaǵy sapany qamtamasyz etý komıtetiniń tóraǵasy Ernur Dáýenov beınebaılanys arqyly habarlama jasady.

Jıyndy qorytyndylaǵan QR Oqý-aǵartý mınıstri Ǵanı Beısembaev talqylanǵan máseleler boıynsha óz pikirin bildirip, Syr óńirinde atqarylǵan jumystarǵa oń baǵa berdi. «Mınıstrlik bilim alýshylardyń bilim sapasy boıynsha monıtorıng júrgizgen bolatyn. Monıtorıng qorytyndysymen Qyzylorda oblysy respýblıkada birinshi orynǵa shyqty», — dep atap ótti mınıstr.

Munan bólek, Ǵanı Beısembaev Jańaqorǵan kentindegi № 110 mektep-lıtseıin aralap, mektep ujymyna jańa avtobýstyń kiltin tabystady. Aıta keteıik, Qyzylorda oblysy ákiminiń qoldaýymen aımaqtaǵy aýyl mektepteri 30 jańa avtobýspen tolyǵady. Bul balalardy mektepke jáne úılerine qaýipsiz tasymaldaýdy qamtamasyz etýge múmkindik beredi. Kólikter 20 jáne 40 orynǵa shaqtalǵan. Mektep avtobýstarynyń tehnıkalyq sıpattamalary barlyq talaptarǵa sáıkes keledi. Qaýipsizdik beldikteri, apatty jaǵdaı týyndaǵandaǵy shyǵý joly, jyldamdyq shektegishter men sáıkestendirý belgileri bar, avtobýsta bala qalǵan jaǵdaıda belgi beretin júıemen jabdyqtalǵan.

Ári qaraı mınıstr Shıeli aýdanyndaǵy Y.Altynsarın atyndaǵy № 219 orta mektepke baryp, bilim salasynda atqarylyp jatqan jumystarmen tanysty. Mektep ǵımaratyn aralap, ashanasy men sport zal ishindegi sport úıirmeleriniń jetistikterin tamashalady. Mektep mýzeıin, kitaphanasyn jáne demeýshiler esebinen jabdyqtalǵan akt zalyn aralap kórdi. Bilim oshaǵynda Jańaqorǵan, Shıeli aýdandarynyń pedagog-sheber, zertteýshi ustazdarymen kezdesý uıymdastyrylyp, salanyń ózekti máseleleri talqylandy.