Oqshaýlaný ońaı emes, biraq bul qazir óte qajetti shara - Zarema Sháýkenova

NUR-SULTAN. QazAqparat - Memleket basshysy Qasym-Jomart Toqaev Tótenshe jaǵdaı jónindegi memlekettik komıssııa otyrysynda qazaqstandyqtardyń áleýmettik ál-aýqaty, ekonomıkalyq jaǵdaı áli de kúrdeli ekendigin atap ótti.

Bul pikirdi QR Prezıdenti janyndaǵy Qazaqstan strategııalyq zertteýler ınstıtýtynyń dırektory Zarema Sháýkenova bildirdi, dep habarlaıdy QazAqparat.

«15 sáýir kúni tótenshe jaǵdaı engizý týraly Prezıdent Jarlyǵynyń merzimi aıaqtalady. Biraq indettiń taralýy men adamdar qazasynyń statıstıkasy tótenshe jaǵdaı rejımin sáýir aıynyń sońyna deıin sozýǵa týra keletinin aıqyn baıqatty. Koronavırýs aýrýynyń sharyqtaý sheginen áli ótken joqpyz. Osy sebepti Prezıdent elorda, Almaty, Shymkent qalalarynda jáne tıisti oblystarda karantın rejımin sáýir aıynyń sońyna deıin uzartýdy tapsyrdy», - dep atap ótti sarapshy.

Onyń aıtýynsha, Memleket basshysy karantındi, ózin-ózi oqshaýlaý tártibin saqtaýdan basqa amal joq bolǵandyqtan osy sheshimdi qabyldaýǵa májbúr boldy.

«Prezıdent jaǵdaıdyń qanshalyqty mańyzdy ekendigin, máselege jeńil qaraýǵa bolmaıtyndyǵyn baıqatty. Iá, oqshaýlaný ońaı emes, bizdiń ómirimizde mundaı jaǵdaı buryn-sońdy bolmaǵan. Biraq bul - óte qajetti shara jáne otandyq jáne halyqaralyq vırýsolog mamandardyń usynysy. Bulaı jasamasaq, Prezıdent aıtqandaı, indet beleń alyp, barsha ultymyzdyń densaýlyǵyna, sondaı-aq, ulttyq qaýipsizdikke qater tónedi», - dedi Z. Sháýkenova.

Sonymen birge, Úkimetke ákimdermen tyǵyz baılanys ornata otyryp, elimizdiń eki iri qalasynda shaǵyn jáne orta bıznesti toqyraýdan birtindep órkendeýge alyp shyǵý úshin, eń aldymen árqaısysymen jeke-jeke júıeli jumys júrgizýdi tapsyrdy.

«Bizdiń aldymyzda eki mindet tur – azamattarymyzdyń densaýlyǵy úshin karantındi saqtaý, sonymen birge kásiporyndardy jeke-jeke jumys rejımine aýystyrý. Sonymen birge, bul úlken qaýip ekenin túsiný kerek. Bul jaǵdaıda oblystar men ortalyqqa baǵynystaǵy qalalar basshylarynyń jaýapkershiligi birneshe ese artady. Prezıdent atqarýshy bılikten sheshimderdi ázirleý men qabyldaýda baıypty bolýdy jáne prezıdenttiń tapsyrmalaryn oryndaýda barynsha jaýapkershilikti kúsheıtýdi talap etti.

Memleket basshysy osy qıyn-qystaý kezeńde óz is-áreketinde myqty, erik-jigerli, jaýapkershilikti jáne baısaldy kóshbasshynyń shynaıy qasıetterin kórsete otyryp, tereń adamgershilik tanytty. Prezıdent halyqtyń barlyq shaǵymynan habardar. Biraq, daǵdarys barlyq kemshilikterdi kórsetýmen qatar, biz paıdalanýymyz qajet úlken múmkindikterge ıe ekenin baıqatty. Sondaı-aq kemshilikterdi de ýaqtyly túzetý qajet», - dedi Zarema Sháýkenova.