Ókpeni jasandy jeldetý apparattary men 11 tonna spırtti elge zańsyz kirgizbek bolǵandar ustaldy

NUR-SULTAN. QazAqparat – 15 shilde kúni qazaqstandyq shekarashylar Qazaqstanǵa zańsyz jolmen 23 ókpeni jasandy jeldetý ınvazıvti emes apparaty men 11 tonna etıl spırtin alyp ótpek bolǵandardy qolǵa túsirdi, dep habarlaıdy QazAqparat Ulttyq qaýipsizdik komıtetine silteme jasap.

Zańsyz zattardy «Qarasý» (Jambyl oblysy) avtokólik ótkizý beketinen alyp ótpek bolǵandardyń tıisti qujaty bolmaǵan.

Uıymdastyrýshylar ÓJJ ınvazıvti emes apparattaryn halyq tutynatyn taýarlardyń arasyna jasyrǵan, al etıl spırtin qujatta «qolǵa arnalǵan gıgıenalyq qural» dep kórsetken.

Qolǵa túsirilgen ınvazıvti emes ókpeni jasandy jeldetý apparattary men etıl spırti Jambyl oblystyq ekonomıkalyq tergeý departamentine jiberildi.

Aıta keteıik, osy ótkizý beketinde birneshe ret zańsyz jolmen medıtsınalyq buıymdar men spırt ónimin alyp ótpek bolǵan adamdar ustalǵan edi.