OQO jurtshylyǵy Saıası qýǵyn-súrgin jáne asharshylyq qurbandaryn eske aldy
Aıtýly shara «Ana men bala» eskertkishine gúl shoqtaryn qoıýdan bastaldy.
Keıin jıynǵa qatysýshylar «Qasiret» kesheni janyna jınalyp, bir mınýttyq únsizdik jarııalady. Óskeleń urpaqqa bul kúnniń mańyzyn uǵyndyrý maqsatynda Alash qaıratkerlerine arnalǵan «Tulǵalar taǵylymyna taǵzym» atty teatrlandyrylǵan qoıylym sahnalandy. Qazaq halqynyń tarıhynda máńgi iz qaldyrǵan «Tar jol, taıǵaq keshken» jyldary qurban bolǵan bozdaqtarymyzdy eske alýǵa arnalǵan sharaǵa oblys ákimi Janseıit Túımebaev qatysyp, sóz sóıledi.
«Respýblıkamyzda 4 mıllıonǵa jýyq halqymyz asharshylyqtan kóz jumsa, 113 myń adam qýǵyn-súrginge ushyrap, 25 myń zııaly azamatymyz jazyqsyz atyldy. Osy qasiretti jyldary Ońtústik Qazaqstan oblysy boıynsha 2500 adam "halyq jaýy" retinde qurban boldy. Al urpaqtary "halyq jaýynyń balasy" atanyp, ómirdiń qıyndyqtary men azaptaryn bastarynan keshti. Mıllıondaǵan adamnyń ómirin jalmaǵan qaraly kezeńdi el umytpaq emes. Elbasymyz 1997 jyly 31 mamyrdy «Saıası qýǵyn-súrgin jáne asharlyq qurbandaryn eske alý kúni» dep belgilep, Jarlyqqa qol qoıǵan bolatyn. Mine búgin qıyn-qystaý jyldardaǵy sheıit bolǵan arystarymyzdy eske alyp, taǵzym etetin kún», - dedi Janseıit Qanseıituly.
«Alashtyń armany - azattyq tańy» atty sharada saıası qýǵyn-súrgin qurbany, Alash ardaqtysy Qoshke Kemeńgerulynyń shóberesi Kemeńger Qaıyrbek Rızabekuly sóz sóıledi. Sol bir zulmatty jyldardy jadyna oraltyp, estelikter aıtty. Sonymen qatar, bul kúni Turar Rysqulov, Názir Tórequlov, Sultanbek Qojanov atyndaǵy jáne oblystyq saıası qýǵyn-súrgin qurbandary mýzeıiniń arnaıy kórmesi uıymdastyryldy. Shara sońynda Shymkent qalalyq Saz kolledji quramyndaǵy hor ujymynyń oryndaýynda Ahmet Jubanovtyń «Aq kógershin» áni oryndalyp, beıbitshiliktiń, Táýelsizdiktiń sımvoly retinde stýdent jastar aspanǵa aq kógershinderdi ushyrdy.