OQO: Saǵyntaev ishki jáne syrtqy naryqty ıgergen kásiporyndarda boldy

ShYMKENT. QazAqparat - Búgin Ońtústik Qazaqstan oblysyna jumys sapary aıasynda QR Premer-Mınıstri Baqytjan Saǵyntaev «Ońtústik» ındýstrıaldy aımaǵynyń birqatar nysandarynda bolyp qaıtty, olardyń ishinde shyny ydys shyǵaratyn «EýroKrıstall» JShS zaýyty jáne keramıkalyq granıt óndiretin «Zerde Keramıka» JShS zaýyty bar. Sondaı-aq, ol óndiriske jańǵyrtý jumystaryn júrgizý keleshegimen tanysty. Bul týraly PrimeMinister.kz saıtynda habarlandy.

Baqytjan Saǵyntaev birinshi kezekte «EýroKrıstall» óndiristik ǵımaratynda boldy, onda shyny ydys shyǵarýdyń tehnologııalyq protsesimen jáne daıyn ónim túrlerimen tanysty. «EýroKrıstall» JShS - óńirdegi shyny qutylar men bótelkeler shyǵaratyn alǵashqy zaýyt. Kásiporyn jumysynyń arqasynda atalǵan ónimderdiń ımporty edáýir almastyrylady, sebebi zaýyt jylyna 60 mln dana ónimin tek ishki naryqqa ǵana jetkizedi.  

Budan keıin, QR Premer-Mınıstri keramıkalyq granıt shyǵaratyn «Zerde Keramıka» JShS kásipornynda boldy. Aıta ketken jón, bul Qazaqstandaǵy keramıkalyq granıt óndiretin jalǵyz zaýyt. Ol el qajettiliginiń jalpy kóleminiń 40%-yn tolyqtyrady. Odan ózge, zaýyt ónimderiniń bir bóligin shekaralas elderge eksporttaıdy.

Aıta ketken jón, 2010 jyldan bastap qyzmet kórsetetin «Ońtústik» ındýstrıaldy aımaǵynda jalpy somasy 55,8 mlrd teńgege, 5 myń jumys orny ashylatyn 85 ınvestıtsııalyq joba iske asyrylýda. Búgingi tańda 21,4 mlrd teńge somasynda, 3 myńnan astam jumys orny ashylǵan 46 joba júzege asyrylǵan.

Sondaı-aq, qazirgi tańda oblystyń aýdandary men qalalarynda ózge de ındýstrıaldy aımaqtardy qurý jumystary jalǵastyrylyp jatyr. Búgingi kúnge deıin 9 aımaq paıdalanýǵa berilgen, olardyń jalpy aýdany 699 gektardy quraıdy. Jalpy, oblystyń barlyq ındýstrıaldy aımaqtarynda somasy 167 mlrd teńge bolatyn, 10 myń jumys orny ashylatyn 173 ınvestıtsııalyq joba iske asyrylýda.

Indýstrıaldy aımaqtyń ınvestorlarǵa daıyn ınfraqurylym, naryq qunynan tómengi baǵada jerdi satyp alý nemese jalǵa alý múmkindigin, yńǵaıly logıstıkalyq júıe, tabıǵı monopolııalar qyzmetterine tómendetilgen tarıfter men jobalardy súıemeldeýdi usynatynyn aıta ketý kerek.

Indýstrıaldy jáne arnaıy ekonomıkalyq aımaqtardyń qyzmet etýi elimizde shıkizattyq óndiristen sapaly, qaıta óńdelgen ónimderdi shyǵarýǵa kóshýge jáne shıkizattyq emes eksportty ulǵaıtýǵa  qolaıly jaǵdaılar jasaıdy.