OQO: Otyrar aýdanynyń Aqqum aýlynda jóndelgen kóshe ashyldy

ShYMKENT. QazAqparat - QR Táýelsizdiginiń 25 jyldyǵyna oraı Ońtústik Qazaqstan oblysynyń Otyrar aýdanyna qarasty Aqqum aýylynda qaıta jańǵyrtylǵan Jánibek Omaruly kóshesiniń saltanatty ashylýy ótti, dep habarlaıdy aýdan ákimdiginiń baspasóz qyzmeti.

Aýyl turǵyndaryn mereke qarsańynda qýanyshqa bólegen sharaǵa aýdan ákiminiń orynbasary Ábdiǵalı Júnisov arnaıy qatysyp, kópshilikti quttyqtady.

«Elimiz egemendigin alǵan 25 jyldyń ishinde qaryshtap damyp, memleketimiz ekonomıkasy joǵary elder qataryna endi. Egemendik alǵan jyldar men qazirgi jaǵdaıdy salystyrý múmkin emes. Elimiz órkendedi, ósti, ásem de sulý qalalar boı kóterip, joldar jóndeldi. Elbasymyz N.Á.Nazarbaevtyń tapsyrmasyna saı oblystar men qalalardy, aýdandar men aýyl-aımaqtardy abattandyryp, kórkeıtý úshin qarjylar kóptep bólinýde. QR Táýelsizdigine 25 jyl aıasynda Elbasymyzdyń syndarly saıasatyn oryndaý barysynda Jánibek Omaruly kóshesiniń ortasha jóndeý jumystary aıaqtalyp, Sizderdiń ıgilikterińizge berilip otyr», - degen aýdan ákiminiń orynbasary óziniń izgi lebizin bildirdi. 
Sharanyń lenta qııý qurmetine Jánibek Omarulynyń inisi Qanybek Omarov pen Á.Júnisov ıe boldy. Shara sońynda Qanybek Omarov kópshilikke alǵys jaýdyryp, aq batasyn berse, aýyl ónerpazdary ásem ánnen shashý shashty.