OQO-nyń úkimettik emes uıymdary latyn álipbıin qoldaıdy
Búgingi tańda elimizdegi eń ózekti taqyryptyń biri, Elbasynyń «Bolashaqqa baǵdar: rýhanı jańǵyrý» maqalasyndaǵy memlekettik tilimizdiń latyn álipbıine kóshý máselesi bolyp otyr. Osyǵan baılanysty jer-jerde osy taqyryp jóninde qyzý talqylaý bolyp jatyr. Bul bastamanyń tıimdiligi týraly usynystar da keń nasıhattalýda. Atalmysh taqyryp aıasynda, bıylǵy jyldyń 18 qyrkúıegi kúni OQO «Azamattyq alıansy» assotsıatsııasynyń ǵımaratynda «Ońtústik Qazaqstan oblysynyń úkimettik emes uıymdary latyn álipbıine kóshýdi qoldaıdy» taqyrybynda kezdesý ótti.
Kezdesý barysynda QR Parlamenti Májilisinde tanystyrylǵan qazaq tiliniń latyn grafıkasyndaǵy jańa álipbıiniń jobasy talqylandy. «Ońtústik Qazaqstan oblysynyń Azamattyq Alıansy» zańdy tulǵalardyń qaýymdastyq nysanyndaǵy birlestiginiń tóraǵasy Jamalbek Sháripbek, «Ońtústik Qazaqstan oblysynyń isker áıelderi assotsıatsııasy» qoǵamdyq birlestiginiń tóraıymy Quralaı Bekenova taqyryp tóńireginde sóz sóılep, baıandama jasady.
Úkimettik emes uıymdar atynan sóz sóılegen Sháripbek Jamalbekuly, latyn álipbıi álemdegi eń tanymal jazýlardyń biri ekendigin jáne Elbasynyń latyn álipbıine kóshý bastamasyn bir aýyzdan qoldaı otyryp, nasıhattalýyna úles qosatynyn jetkizdi. Sonymen qatar, OQO úkimettik emes uıymdary atalǵan bastamaǵa qoldaý bildirip, Qazaqstan halqyna úndeý jarııalady.