OQO-nyń Túlkibas aýdany tabıǵı gazben tolyq qamtyldy (FOTO)

ShYMKENT. QazAqparat - El Táýelsizdiginiń 25 jyldyǵy jáne 6 shilde - Astana kúnine oraı, búgin Túlkibas aýdanyndaǵy úsh eldi mekenge kógildir otyn berildi. Osylaısha, Túlkibas oblys boıynsha 100 paıyz tabıǵı otynmen qamtamasyz etilgen birden-bir aýdanǵa aınaldy. Bul týraly oblys ákiminiń baspasóz qyzmeti habarlady.

Aýdannyń taýly aımaǵynda ornalasqan Keltemashat aýyldyq okrýginiń Dáýbaba-1, Dáýbaba-2 jáne Tórtkúl aýyldaryna jetken tabıǵı gazdy berý saltanatyna qatysqan óńir basshysy B.Atamqulov jergilikti halyqtyń qýanyshymen bólisti. Oblys ákimi ondaǵy 94 jastaǵy jergilikti aqsaqal Sultan Kenjebekovpen birge kógildir otyn alaýyn jaǵyp, qarııanyń shańyraǵynda bolyp, dastarhanynan dám tatty.

Aıta ketken jón, búgingi kógildir otyn jetken úsh eldi mekende 1,5 myńǵa jýyq halyq turady. Bul jumystar úshin oblystyq bıýdjetten 2 014 mln teńge bólingen. Bas qalanyń týǵan kúni qarsańynda Túlkibastyń tolyqtaı gazdandyrylýynyń tuspa-tus kelýi - bul el Táýelsizdiginiń shırek ǵasyrlyq belesindegi úlken jetistik desti jurt.

Jalpy uzyndyǵy 34,27 shaqyrym bolatyn gaz qubyrynyń qurylys jumystaryn «Energoresýrs» JShS mekemesi júrgizgen. Merdigerdiń aıtýynsha, gaz ótkizý jumystary 2015 jyly bastalyp, osy jyldyń maýsym aıynda aıaqtalypty. Aıta ketken jón, jalpy aýdanda sońǵy 5 jylda 37 eldi mekendi gazdandyrý jumystary júrgizilgen.