OQO-nyń ákimi jazýshy-dramatýrg Turysovty mereıtoıymen quttyqtady

ShYMKENT. QazAqparat - Ońtústik Qazaqstan oblysynyń ákimi Janseıit Túımebaev jazýshy-dramatýrg Erkinbek Turysovpen kezdesti. Aımaq basshysy Qazaqstannyń eńbek sińirgen qaıratkeri, Halyqaralyq ádebı «Alash» syılyǵynyń laýreaty bolǵan qalamgerdi 90 jasqa tolǵan mereıtoıymen quttyqtady, dep habarlaıdy QazAqparat tilshisi.

Jazýshy-dramatýrg Erkinbek Turysov sanaly ǵumyrynda «Ońtústik Qazaqstan» oblysy gazetiniń ádebı qyzmetkeri, bólim meńgerýshisi, menshikti tilshisi, aýdandyq «Alǵabas» gazetiniń redaktory boldy. Búginde 90 jasqa kelip otyrǵan jazýshy uzaq jyldar memlekettik, qoǵamdyq qyzmet atqara júrip, týǵan jer, ósken ólke, zamandastar ómirinen 600-ge jýyq tarıhı, kórkem pýblıtsıstıkalyq shyǵarmalar jazyp, ulttyq rýhanı mádenıetimiz ben ádebıetimizdiń damýyna ólsheýsiz úles qosqan tulǵa.

«Bıylǵy jyly sizdiń 90 jyldyq mereıtoıyńyzǵa oraı oblysymyzda birqatar is-sharalar uıymdastyrylyp otyr. Kúni keshe ǵana Báıdibek aýdanynyń Aqtas, M.Áýezov atyndaǵy jalpy orta mektepterinde oqyrmandar konferentsııalary, aýdandyq sport kesheninde voleıboldan týrnır jáne shyǵarmashylyq kesh uıymdastyryldy. Búgin Túrkistan saltanat saraıynda «Dáýir dastangeri atty» shyǵarmashylyq keshińiz ótpek. Siz, ulttyq ádebıetimizdiń kóshbasyndaǵy aǵa býyn ókilderiniń birisiz. Sondyqtan sizdiń shyǵarmalaryńyzdy búgingi urpaqqa nasıhattap, olardy otansúıgishtikke tárbıeleýimiz qajet», - dedi Janseıit Qanseıituly.

Taıaýda «Bir ólke - bir kitap» oblystyq aktsııasy aıasynda qalamgerdiń «Temirlan» romanyn oqý tańdaldy. Romanda álemge áıgili Ámir Temirdiń aıaqtalmaǵan aqyrǵy joryǵy, búgingi Orta Azııa men Iran, Ońtústik Qazaqstan jerinde, budan alty ǵasyr buryn ótken oqıǵalar jaıynda tarıhı derek, avtor jıhanger padıshahtyń tulǵasyn jáne qorshaǵan ortanyń barsha tirshilik-tynysyn keń sýretteıdi.

Aıta keteıik, qalamger jazǵan «Kelinshektaý», «Aqbaqaı», «Qyran taýy», «Quralaı joly», «Túnder sazy», «Tulpardyń izi», «Nurjaýdyń nurly túnderi», «Temirlan», «Báıdibek», «Shyǵystyń shyń uldary», «Zamana perzentteri», «Máńgilik saryn» atty dúnıeler - ulttyq ádebıetimizdiń ulaǵatty týyndylary sanalady. 2017 jyldyń qyrkúıek aıynda avtordyń eki tomdyq shyǵarmalar jınaǵy «Qazyǵurt» baspasynan jaryqqa shyqty.

Erkinbek Turysov sondaı-aq qazaq ádebıetin damytýǵa sińirgen jemisti eńbegi úshin eki márte (1977-1987j.j.) Qazaqstan Joǵary Keńesiniń Qurmet gramotasymen, «Qurmet» ordenimen jáne «Respýblıka Táýelsizdigine 20 jyl», «Ońtústik Qazaqstanǵa sińirgen eńbegi úshin» medaldarymen marapattalǵan. Qalamgerge «Ońtústik Qazaqstan oblysynyń jáne Báıdibek aýdanynyń qurmetti azamaty» ataǵy berilgen.