OQO: Naýryzdaǵy qoıylymǵa 300 jylqy men 500 kógershin qatystyrylady

ShYMKENT. QazAqparat  - Búginde Ońtústik Qazaqstan oblysynda Qazyǵurt taýynda atap ótiletin Naýryz merekesine úlken daıyndyqtar júrgizilýde. Mádenıet basqarmasynyń baspasóz hatshysy Mádına Sabyrdyń aıtýynsha, teatrlandyrylǵan qoıylymdarǵa 300 jylqy, 500 kógershin men túıeler qatystyrylatyn bolady, dep habarlaıdy QazAqparat tilshisi.

Baspasóz hatshynyń sózinshe, Atbulaq aýylynda uıymdastyrylatyn  «Ulystyń uly kúni - áz Naýryz» merekesine oraı 40-tan astam kıiz úı tigiledi. Qazir munda meıramǵa daıyndyq jumystary júrgizilýde.

«Qazir atalǵan etnoaýyl jáne oǵan kireberis jerine arnaıy qaqpa ornatylyp, altybaqandar men ulttyq salt-dástúrler kórsetiletin arnaıy shaǵyn sahnalar qoıylýda. Arnaıy alańshalarda ulttyq oıyndar ótkizilip, qolóner sheberleri men ulttyq taǵamdardyń kórmesin uıymdastyrý josparlanyp otyr. Al saltanatty is-shara ótetin úlken sahna Nuq paıǵambardyń kemesi ispettes jasalýda», - deıdi Madına Sabyr.

 

Merekelik shara «Tirshiliktiń bastaýy - Qazyǵurt» qoıylymymen bastalyp,  «Kúnniń jańarýy», «Qydyr atanyń 12 aımen kezdesýi», «Tabıǵattyń oıanýy», «Naýryz toıy» sııaqty sahnalyq qoıylymdarmen jalǵasady. Sondaı-aq «Rýhanı jańǵyrý - ultty ulyqtaýdyń uly joly» jáne «Táýelsizdik túndigi - Astana» atty sazdy-horeografııalyq kompozıtsııalary jurt nazaryna usynylatyn bolady. Olarǵa barlyǵy 1500 ónerpaz jumyldyrylyp, 300 jylqy, 500 kógershin men túıe jegilgen kúımeler qatystyrylady.

«Naýryz Qazyǵurttan bastalady» is-sharasyna oblystyq mádenıet jáne tilderdi damytý basqarmasyna qarasty mádenıet jáne óner mekemeleriniń ártisteri jáne «Shamsınýr», «Farab», «Tumar», «Juldyzdar», «Tańsholpan», «Qarakóz», «Shattyq» bı ujymdary qatysady. Olar merekelik, patrıottyq rýhtaǵy ásem ánder men kúılerdi, óńirimizden shyqqan sazgerler men kúıshilerdiń tól týyndylaryn oryndaıdy»,- deıdi Madına Sabyr.

 

Mádenıet basqarmasy  21 naýryz kúni saǵat 11.00-de bastalatyn aýqymdy merekelik sharaǵa barsha oblys turǵyndary men qala qonaqtaryn shaqyrady.