OQO: Maqtaralda «Qazaq tiliniń úzdik oqytýshysy - 2016» baıqaýy ótti

ShYMKENT. QazAqparat - Maqtaral aýdandyq Іshki saıasat, mádenıet jáne tilderdi damytý bólimine qarasty Tilderdi oqytý jáne damytý ortalyǵynyń uıymdastyrýymen Qazaqstan Respýblıkasy Táýelsizdiginiń 25 jyldyǵyna oraı «Qazaq tiliniń úzdik oqytýshysy - 2016» baıqaýy bolyp ótti, dep habarlaıdy aýdan ákimdiginiń baspasóz qyzmeti. Báıgege ózge tildi synyptarǵa qazaq tilinen sabaq beretin ustazdar qatysty.

«Ózin-ózi tanystyrý», «Oqytýshynyń jeke portfolıosy», «Sabaq úlgisin kórsetý» sharttary boıynsha qatysqan ustazdarǵa ádil qazylar alqasy bilimine, ózin-ózi ustaýyna, portfolıonyń birizdiligi men erekshe qurylymyna, sabaq ótý protsesindegi jańa tehnologııalardyń tıimdi paıdalanylýyna basa nazar aýdardy.

Ádil qazylar alqasynyń sheshimimen І oryndy Ál-Farabı mektebiniń qazaq tili oqytýshysy, ózbek ultynyń ókili Nasıba Kalandarova ıelendi. ІІ oryndy №1 M. Gorkıı atyndaǵy mektep-gımnazııasynyń qazaq tili muǵalimi Aınur Holbaeva jeńip alsa, ІII oryndy «Myrzakent» jalpy orta mektebiniń qazaq tili muǵalimi  Ǵalııa Tórequlova enshiledi. Baıqaýǵa qatysqan muǵalimderdiń daıyndyǵy joǵary boldy. Qazylardyń jeńimpazdardy anyqtaýy da ońaıǵa soqqan joq. Bári de bir-bir mekteptiń aldyńǵy qatarly úzdik ustazdary. Osylaısha úzdikterdiń úzdikteri anyqtaldy. Baıqaýdyń barlyq qatysýshylary ortalyq tarapynan alǵys hat, dıplom jáne baǵaly syılyqtarmen marapattaldy.