OQO: Kentaý qalasy bıyl tolyqtaı kógildir otynmen qamtylady

ShYMKENT. QazAqparat - Ońtústik Qazaqstan oblysynyń Kentaý qalasy jaqyn kúnderi tolyqtaı kógildir otynmen qamtylady. Kenshiler qalasynyń irgesinde búginde gaz taratý stantsııasynyń qurylys jumystary tolyǵymen aıaqtalǵan. Bul týraly oblys ákiminiń baspasóz qyzmeti uıymdastyrǵan press-týr kezinde málim boldy, dep habarlaıdy QazAqparat tilshisi.

Kentaý qalalyq turǵyn úı-kommýnaldyq sharýashylyǵy, jolaýshylar kóligi jáne avtomobılder joldary bóliminiń basshysy Qadyrhan Tólepbergenov qazirgi tańda qalada jáne qalaǵa qarasty eldi mekenderde ishki gaz qubyrlaryn tartý jumystary júrgizilip jatqanyn aıtady.

«Avtomattandyrylǵan gaz taratý stantsııasynyń qurylys jumystary 2015 jyly bastalyp, 2017 jyly aıaqtaldy. Jobanyń jalpy quny 3 mlrd 842 mln teńgeni quraıdy. Merdiger tıisti jumysyn atqaryp shyqty. Búginge deıin 53,7 shaqyrym magıstraldyq gaz qubyrlary tartyldy. Endigi jerde ishki gaz qubyrlaryn tartý jumystary qaldy. 3 kezeńnen turatyn sharýa tolyǵymen aıaqtalǵan soń, qala turǵyndary tolyq gazben qamtylatyn bolady», - dedi Qadyrhan Tólepbergenov.

Sondaı-aq, BAQ ókilderi qala aýmaǵynda salynyp jatqan birqatar áleýmettik nysandardyń qurylys jumystarymen tanysty. Munda Elbasynyń «Prezıdenttiń bes áleýmettik bastamasy» atty úndeýinde aıtqan eldegi 75 myń stýdentti jataqhanamen qamtý týraly tapsyrmasy josparǵa saı oryndalyp keledi.

Búginde oblystyq qurylys basqarmasynyń tapsyrysymen qalada 300 oryndyq 2 jataqhana boı kóterýde. Jobanyń jalpy quny 443 mln 883 myń teńgeni quraıdy. Sońǵy úlgide salynyp jatqan stýdentter úıi jospar boıynsha bıyl paıdalanýǵa beriledi. Qalada budan ózge turǵyn úı máselesi de jospar boıynsha sheshimin taýyp keledi. Búginde shaharda 2086 adam turǵyn úı kezegine turǵan bolsa, qazir munda 60 páterli 7 kópqabatty úıdiń qurylys jumystary júrgizilýde. 2020 jylǵa deıin taǵy 35 úı salynatyn bolady dep josparlanǵan.