OQO-ǵy saıası qýǵyn-súrgin qurbandary mýzeıinde 16 myńnan asa jádiger saqtalǵan

Búgin Ońtústik Qazaqstan oblysy ákimi Janseıit Túımebaev Shymkent qalasynda ornalasqan oblystyq saıası qýǵyn-súrgin qurbandary mýzeıiniń jumysymen tanysty. Onda ákim mýzeı eksponattaryn aralap kórip, kitap kórmesin tamashalady jáne «Taǵzym» zalyndaǵy 2500 repressııa qurbandarynyń rýhyna bas ıdi, dep habarlaıdy QazAqparat OQO ákiminiń baspasóz qyzmetine silteme jasap.  

Mýzeı qyzmetkerlerimen bolǵan kezdesýde ákim jappaı saıası qýǵyn-súrgin qurbandaryna arnalyp ashylǵan mýzeı ótken ǵasyrdyń saıası qýǵyn-súrgin qurbandaryn máńgi este qaldyrýdaǵy negizgi áreketterdiń bir ekenin aıtty.

«Qazaqstan Respýblıkasynyń Prezıdenti Nursultan Ábishuly Nazarbaev «Bolashaqqa baǵdar: rýhanı jańǵyrý» maqalasynda Qazaqstannyń revolıýtsııalyq emes, evolıýtsııalyq damýy ultty órkendetetindigin aıtyp ótti.

Kúlli HH ǵasyr revolıýtsııalyq silkinisterge toly boldy. Bul, osy aýmaqtaǵy barsha ulttarǵa meılinshe áser etip, búkil bolmysyn ózgertti, halqymyz úshin de qasiretke toly, zobalań da zulmat jyldar boldy. Biz, tarıhtyń aşy sabaǵynan bolashaqqa ońtaıly oı túıip, ózimizden bastap, rýhanı baılyǵymyz ben áleýmettik-ekonomıkalyq úrdisimizdi zaman talabyna saı jańǵyrtyp, damytý isine at salysyp, keleshek urpaǵymyzdyń jarqyn bolashaǵy úshin aıanbaı eńbek eteıik!»,-dedi ákim.

Munymen qosa, aımaq basshysy Kenesary hannyń nemeresi, Alashorda úkimetiniń múshesi, saıası qýǵyn-súrgin qurbany Ázimhan Kenesarınniń urpaǵy Asylhan Áshimhanovpen, Qazaqtannan shyqqan tuńǵysh rejısser, qoǵam jáne óner qaıratkeri, saıası qýǵyn-súrgin qurbany Jumat Shanınniń nemeresi Raıhan Myrzaǵalıevamen kezdesip, ıyqtaryna shapan japty.

Búgingi tańda mýzeı qorynda 16 myńnan asa jádigerler, qujattar men fotoqujattar saqtaýly. Jyl saıyn mýzeıge 15 myńǵa jýyq adam kelip, 300-den astam jańa eksponattarmen tolyqtyrylady. Munan bólek, munda  20-ǵa jýyq mádenı kópshilik is-sharalar ótkizilip turady.

Aıta keteıik, bıyl Alash partııasynyń qurylǵanyna - 100 jyl, jazyqsyz japa shekken qazaqtan shyqqan tuńǵysh dıplomat, memleket jáne qoǵam qaıratkeri N.Tórequlov pen elimizdiń tuńǵysh kásibı rejısseri, dramatýrg, qýǵyn-súrgin qurbany J.Shanınniń týylǵanyna - 125 jyl.