OQO-daǵy halyqqa qyzmet kórsetý ortalyqtary 16 saǵat qyzmet kórsetpek

ShYMKENT. QazAqparat - Ońtústik Qazaqstan oblysyndaǵy halyqqa qyzmet kórsetý ortalyqtary táýligine 16 saǵattan jumys isteýge kóshýde. Bul joba aldymen Qarataý aýdandyq bólimshesinde júzege asyp otyr. 

Sebebi, keshki mezgilde ortalyqtyń jumysyna júginetinder kóbeıgen, dep habarlaıdy QazAqparat HAA tilshisi.  

«Azamattarǵa arnalǵan úkimet» memlekettik korporatsııasy" KE AQ Ońtústik Qazaqstan oblysy boıynsha fılıaly - «Halyqqa qyzmet kórsetý ortalyǵy» departament dırektory  Erkebulan Álseıitovtiń aıtýynsha, búginde óńirde  33 halyqqa qyzmet kórsetý ortalyǵy jumys isteıdi. Onda sońǵy alty aıda 3 mıllıonnan astam qyzmet kórsetilgen.

«Jyl basynan beri ortalyqqa 22 myńnan astam balanyń týylǵany týraly ótinish kelip túsken. 7 myńnan astam ana bala kútimine baılanysty  járdemaqy taǵaıyndaýǵa qujat tapsyrǵan. 4 myńǵa jýyq azamattan sábıin balabaqsha kezegine tirkeý jóninde ótinishter qabyldandy. Ortalyqta múmkindigi shekteýli jandarǵa qyzmet kórsetý jumystary da júıelengen. Sýrdoaýdarma tilin meńgergen 89 maman jumys isteıdi»,-deıdi Erkebulan Álseıitov.

Departament dırektory sondaı-aq, aýdan-qalalardaǵy halyqqa qyzmet kórsetý ortalyqtarynyń mamandary keleshekte  jeke sot oryndaýshylar, zańgerler jáne advokat qyzmetkerlerimen bir keńsede otyryp, jumys isteıtinin aıtady. Bul sharalar óz kezeginde  azamattardyń ýaqytty tıimdi paıdalanýyna oń yqpal etedi dep otyr.